Հանրային պաշտպանը իր տեղակալներից մեկին է նշանակել Ալեկո Էլիսաշվիլիի զարմուհուն

Ջուլաղիձեն աշխատանքային փորձ ունի միայն Էլիսաշվիլիի և Իոսելիանիի մինչ կուսակցությունը հիմնած Քաղաքացիական շարժման մեջ, նախ եղել է նախագծի պատասխանատու, ապա՝ գործադիր տնօրեն։

«Հանրային պաշտպանը Լևան Իոսելիանին է, ոչ թե Ալեկո Էլիսաշվիլին։ Հետևաբար, շահերի բախում չկա։ Ես Լևանի հետ աշխատելու երկար փորձ ունեմ, և ինձ ոչ մի անհարմարություն չի պատճառում, որ նա ինձ առաջարկեց հանրային պաշտպանի տեղակալի պաշտոնը, և ես համաձայնեցի»,- նշում է Նաթիա Ջուլաղիձեն։ Նա կհամակարգի և կվերահսկի Հանրային պաշտպանի գրասենյակի երեխաների իրավունքների, հաշմանդամություն ունեցող անձանց իրավունքների, գենդերային, իրավահավասարության վարչությունների, Արևելյան և Արևմտյան Վրաստանի բաժինների գործունեությունը։

Հանրային պաշտպանն այսօր ներկայացրել է ևս մեկ նոր տեղակալի՝ Էլենե Ղուդուշաուրիին։ Ղուդուշաուրին 2021-2023 թվականներին աշխատել է որպես Վրաստանի խորհրդարանի փոխնախագահի քարտուղարության գլխավոր մասնագետ։ 2015-2021 թթ.՝ որպես Թբիլիսիի մունիցիպալիտետի խորհրդի իրավական հարցերի և մարդու իրավունքների պաշտպանության հանձնաժողովի քարտուղարության ավագ մասնագետ: 2012-2015 թվականներին իրավաբան է եղել «K&K Consulting» իրավաբանական ընկերությունում։

Ղուդուշաուրին կհամակարգի և կվերահսկի Հանրային պաշտպանի գրասենյակի քրեական արդարադատության դեպարտամենտի, կանխարգելման ազգային մեխանիզմի, ռազմավարական դատավարության բաժնի, վերլուծական բաժնի և մարդու իրավունքների կրթության վարչության գործունեությունը:

Հանրային պաշտպանն ունի ընդհանուր առմամբ երեք տեղակալ։ Գիորգի Բուրջանաձեն և Էկատերինե Սխիլաձեն մարտի 31-ին լքել են իրենց պաշտոնները. Բուրջանաձեն հանդես է եկել անձնական դիմումով, Սխիլաձեն պաշտոնական դիմում չի գրել։

«Ես ուզում էի շարունակել պետական ​​ծառայությունը։ Ես փորձեցի ու ամեն ինչ արեցի, բայց ռուսական օրենքի հեղինակները չուզեցին»,- ասել է Գիորգի Բուրջանաձեն։ Նա հանրային պաշտպանի պաշտոնում հասարակական կազմակերպությունների կողմից առաջադրված թեկնածուներից էր, սակայն խորհրդարանը մյուսների հետ մերժեց նաև նրա թեկնածությունը։ Իսկ մարտի 7-ին, երբ «Վրացական երազանքը» առաջին ընթերցմամբ ընդունեց «Օտարերկրյա ազդեցության գործակալների թափանցիկության մասին» ռուսական օրենքը, առանց հանրային քննարկման և քաղաքացիական հասարակության ներգրավման, Լևան Իոսելիանին 6 տարով ընտրվեց հանրային պաշտպան։ «Երազանք»-ի անդամների հետ միասին Իոսելիանիի թեկնածությունը պաշտպանել են անկախ պատգամավորներ՝ Թամար Կորձայան և Թեոնա Աքուբարդիան, ինչպես նաև «Հանրապետական ​​կուսակցության» նախագահ Խաթունա Սամնիձեն։

«Վրաստանի լուրեր»-ին հայտնի էր, որ Թամար Գվարամաձեն կպահպանի հանրային պաշտպանի առաջին տեղակալի և աշխատակազմի ղեկավարի պաշտոնը, ինչն այսօրվա ճեպազրույցում Լևան Իոսելիանին հաստատել է։