«Հանուն փոփոխությունների կոալիցիայի» առաջնորդները չեն հանդիպի ԵԽ գլխավոր քարտուղարի հետ

Կոալիցիայի «Դրոա» կուսակցության նախագահ Էլենե Խոշտարիան սխալ է համարում այն, որ ԵԽ գլխավոր քարտուղարը, որի հիմնական մանդատը մարդու իրավունքներն են, չի հանդիպում քաղբանտարկյալներին և բանտ չի այցելում։ Դրա համար Ալեն Բերսեին քննադատում է նաև «Գիրչի՝ ավելի շատ ազատություն» կուսակցության առաջնորդ Զուրաբ Գիրչի Ջափարիձեն։

«Ցանկացած կառույցի ներկայացուցիչ, որն այսօր գալիս է այս երկիր. ա) պետք է տեսնի ծեծված ժողովրդին և լսի նրանց պատմությունները, բ) պետք է այցելի բանտ, տեսնի քաղբանտարկյալներին և լսի նրանց պատմությունները, գ) երեկոյան գոնե մեկ անգամ պետք է գնա Ռուսթավելի ու խոսի այնտեղ կանգնած մարդկանց հետ։ Հատկապես, երբ մի քանի օրով ես ժամանել, և դա 2-3 ժամանոց այցելություն չէ»,- գրել է Ջափարիձեն Facebook-ում։

Ալեն Բերսեն առանձին հանդիպում է ընդդիմադիր կուսակցությունների հետ։ Այսօր նա արդեն հանդիպումներ է ունեցել «Միասնություն-Ազգային շարժման» և «Ուժեղ Վրաստանի» ներկայացուցիչների հետ։

«Սա այց չէ, որը կազդի ընտրությունների կամ իշխանության լեգիտիմության վրա։ Կարծում եմ, որ պարոն Բերսեն ինքը սա կասի բացեիբաց»,- ասել է «Միասնություն-Ազգային շարժում» կուսակցության նախագահ Թինա Բոկուչավան։ Ինչպես նշել է նա, հանդիպմանը բարձրացվել է ցույցերի ժամանակ ապօրինի բերման ենթարկված քաղաքացիներին ազատ արձակելու հարցը։

«Նրանք այստեղ են, քանի որ Վրաստանը 25 տարի Եվրոպական խորհրդի անդամ է և պետք է լինի եվրոպական ընտանիքի անդամ, ոչ թե այն պատճառով, ինչ «Վրացական երազանքն» է քարոզում, իբր լեգիտիմացված են։ Ուղիղ և ընդգծված ասվեց, որ նրանք այստեղ են, քանի որ Վրաստանում ընթացող գործընթացները մեծ անհանգստություն են առաջացնում»,- ասել է «Ուժեղ Վրաստանի» առաջնորդ Բադրի Ջափարիձեն։

Եվրախորհրդի գլխավոր քարտուղար Ալեն Բերսեն դեկտեմբերի 18-ին ժամանել է Վրաստան և արդեն հանդիպել է «Վրացական երազանքի» պատվավոր նախագահ Բիձինա Իվանիշվիլիի, ոչ լեգիտիմ վարչապետ Իրակլի Կոբախիձեի, արտաքին գործերի նախարար Մակա Բոճորիշվիլիի, խորհրդարանի նախագահ Շալվա Պապուաշվիլիի, ինչպես նաև հանրային պաշտպան Լևան Իոսելիանիի և միջազգային հանրության ներկայացուցիչների հետ։ Նախատեսված է հանդիպում նաև քաղաքացիական սեկտորի հետ։

Ալեն Բերսեի հետ Թբիլիսիում են Մարդու իրավունքների և օրենքի գերակայության, ինչպես նաև ժողովրդավարության և մարդու արժանապատվության գլխավոր տնօրինությունների ղեկավարները։