Հայաստանի և Վրաստանի քաղաքացիները սահմանը կկարողանան հատել նույնականացման քարտով

«Սա իսկապես շատ կարևոր է երկկողմ այցերը խթանելու առումով։ Բայց կլինեն նաև որոշ ուղեկցող ռիսկեր, որոնց շուրջ մենք կաշխատենք մեր վրացի գործընկերների հետ»,- ասել է Փաշինյանը։

Հայաստանի և Վրաստանի միջև գործում է միմյանց քաղաքացիների համար առանց մուտքի վիզայի այցելության ռեժիմ:

«Հարևան Վրաստանի հետ առանձնահատուկ հարաբերությունների կառուցումը մեր արտաքին քաղաքական առաջնահերթություններից է, այդպես արտացոլված է նաև կառավարության ծրագրում: Գործնականում ևս պարբերաբար տեղի են ունենում շփումներ, ինտենսիվ կապեր կան բոլոր համապատասխան գործընկերային գերատեսչությունների միջև: Վրաստանը նաև մեր քաղաքացիների համար գործնական և հանգստի նպատակով այցելությունների սիրված վայրերից է: 2019 թվականին 1 միլիոն 365 հազար ՀՀ քաղաքացի է այցելել: Համավարակի ընթացքում հետընթաց է արձանագրվել, և, կարծում ենք, առաջիկայում դինամիկան կվերականգնվի»,- ասել է Հայաստանի արտաքին գործերի նախարար Արարատ Միրզոյանը։

Վրաստանի զբոսաշրջության ազգային գործակալության տվյալներով՝ 2011 թվականին Հայաստանից Վրաստան է ժամանել մոտավորապես 562 հազար այցելու, իսկ 2019 թվականին արդեն 1 միլիոն 365 հազար այցելու։

Վրաստանի վարչապետ Իրակլի Ղարիբաշվիլին այսօր աշխատանքային այցով գտնվում է Հայաստանի Հանրապետությունում։ Այցի շրջանակներում Վրաստանի և Հայաստանի վարչապետների գլխավորությամբ տեղի է ունեցել Վրաստան-Հայաստան միջկառավարական տնտեսական հանձնաժողովի նիստ, ինչպես նաև երկկողմ՝բարձր մակարդակի հանդիպումներ։