Հրաժարական է տվել Հատուկ նշանակության ջոկատի օպերատիվ պլանավորման բաժնի պետը

Facebook սոցիալական ցանցում Վրաստանի և Եվրամիության դրոշներով ՆԳ նախարար Վախթանգ Գոմելաուրիին ուղղված դիմումը հրապարակել է ինքը՝ ոստիկանության գնդապետը։

«Խնդրում եմ, ընտանեկան հանգամանքներից ելնելով, ինձ ազատեք զբաղեցրած պաշտոնից և ազատեք Վրաստանի ՆԳՆ-ի շարքերից»,- գրել է Իրակլի Շայշմելաշվիլին։

Ռուսթավելիի պողոտայում արդեն յոթերորդ օրն է բազմահազարանոց հանրահավաքներ են ընթանում։ Եվրաինտեգրման գործընթացը կասեցնելու «Վրացական երազանքի» որոշման դեմ բողոքող քաղաքացիները դաժանորեն հետապնդվում են ոստիկանական ուժերի կողմից։ Ցուցարարների դեմ օգտագործվում են արցունքաբեր գազ, ջրցան մեքենաներ և այլ հատուկ միջոցներ։ Հավանաբար, օգտագործվել են նաև ռետինե փամփուշտներ։ Ձերբակալվել է ցույցի ավելի քան 300 մասնակից, որոնց մեծ մասին ծեծի են ենթարկել հատուկ ջոկատայինները։

Նոյեմբերի 28-ին ոչ լեգիտիմ վարչապետ Իրակլի Կոբախիձեն հայտարարեց, որ Վրաստանը մինչև 2028 թվականի վերջը օրակարգ չի բերի անդամակցության բանակցություններ սկսելու հարցը և կհրաժարվի ԵՄ բյուջետային դրամաշնորհներից։

Որոշման դեմ բողոքում են նաև պետական ​ծառայողները։ Ներքին գործերի նախարարության ակադեմիայի մարտավարական պատրաստության ծառայության ավագ հրահանգիչ Գիորգի Գաբեխաձեն հրաժարական է տվել։

Վերջին օրերին հրաժարական են տվել ԱՄՆ-ում, Բուլղարիայում, Նիդերլանդներում, Չեխիայում և Լիտվայում Վրաստանի դեսպանները, ինչպես նաև Իտալիայում դեսպանի պաշտոնակատարը։ Պաշտոնը լքել է նաև արտաքին գործերի փոխնախարար Թեյմուրազ Ջանջալիան։