Ի՞նչ է գրված օտարերկրյա դրամաշնորհների դեմ «Վրացական երազանք» կուսակցության օրինագծում

 «Վրացական երազանք» խմբակցության անդամները փոփոխությունների անհրաժեշտությունը բացատրում են «պետության ինքնիշխանության» պաշտպանության շարժառիթով։ Բացատրական գրության մեջ նշված է, որ օրինագծի մշակմանը չի մասնակցել ոչ մի փորձագետ, աշխատանքային խումբ, պետական, ոչ պետական և/կամ միջազգային կազմակերպություն, և չի ուսումնասիրվել այլ երկրների փորձը։

«Դրամաշնորհների մասին» Վրաստանի օրենքում փոփոխությունները հիմնականում նախատեսում են հետևյալ հարցերը.

• Միջազգային բարեգործական, մարդասիրական և այլ հասարակական կազմակերպության (այդ թվում՝ միջազգային սպորտային ասոցիացիա, ֆեդերացիա և կոմիտե), ֆինանսավարկային հաստատության, օտարերկրյա պետության կառավարության կամ նրա ներկայացուցչության, ինչպես նաև արտասահմանյան ձեռնարկատիրական (եթե դրամաշնորհի ստացողը պետությունն է կամ Վրաստանի կառավարությունը) կամ ոչ ձեռնարկատիրական (ոչ առևտրային) իրավաբանական անձի կողմից դրամաշնորհի տրամադրումը պահանջում է Վրաստանի կառավարության կամ Վրաստանի կառավարության կողմից սահմանված լիազոր անձի/մարմնի համաձայնությունը։
• Համաձայնության տրամադրման վերաբերյալ որոշումն ընդունվում է 10-օրյա ժամկետում, և այդ որոշման բողոքարկումը չի կասեցնում դրա գործողությունը։ Նշված համաձայնության բացակայությամբ տրված դրամաշնորհի ստացումն արգելվում է։
• Համաձայնություն ստանալու համար դրամաշնորհ տրամադրող սուբյեկտը Վրաստանի կառավարությանը կամ կառավարության կողմից սահմանված լիազոր անձին/մարմնին պետք է ներկայացնի դրամաշնորհ տվողի (դոնորի) և դրամաշնորհ ստացողի միջև պայմանագրի նախագիծ։ Պայմանագիրը պետք է պարունակի դրամաշնորհի տրամադրման նպատակը, ծավալը, միջոցների օգտագործման կոնկրետ ուղղությունը, դրանց յուրացման ժամկետները և այն հիմնական պահանջները, որոնք դոնորը ներկայացնում է դրամաշնորհ ստացողին։
• Կառավարության պարտադիր համաձայնության կարգը չի տարածվում միջազգային սպորտային ասոցիացիայի, ֆեդերացիայի և կոմիտեի կողմից դրամաշնորհի տրամադրման, արտերկրում միջնակարգ և բարձրագույն կրթություն ստանալու և գիտական աշխատանքի համար տրամադրված անհատական կրթաթոշակի, ինչպես նաև Վրաստանում գործող միջազգային կազմակերպության կողմից դրամաշնորհի ստացման վրա։

Արգելված դրամաշնորհի տրամադրման և ստացման մոնիտորինգն իրականացնող մարմին է սահմանվում Հակակոռուպցիոն բյուրոն։

Օրենքի համաձայն՝ անօրինական դրամաշնորհի տրամադրման և ստացման մոնիտորինգի կարգը, անհրաժեշտության դեպքում, սահմանում է Հակակոռուպցիոն բյուրոն։

Հակակոռուպցիոն բյուրոն մոնիթորինգի նպատակներով իրավասու կլինի.

• պահանջել անձից ֆինանսական հաշվետվություն, եթե կա հիմնավորված կասկած օտարերկրյա դոնորի կողմից դրամաշնորհի տրամադրման կանոնների խախտման վերաբերյալ,
• հարցաքննել ֆիզիկական անձին՝ սույն օրենքով սահմանված կարգով,
• հարցաքննել ֆիզիկական անձին մագիստրոս դատավորի առջև՝ Վրաստանի վարչական դատավարության օրենսգրքով սահմանված կարգով,
• պահանջել անհրաժեշտ տեղեկություններ պետական հաստատություններից, ֆիզիկական անձանցից, իրավաբանական անձանցից (այդ թվում՝ վճարային ծառայությունների մատուցողներից), այլ սուբյեկտներից, ներառյալ հատուկ կատեգորիայի անձնական տվյալներ, այլ անձնական տվյալներ և գաղտնի տեղեկատվություն (բացառությամբ Վրաստանի օրենսդրությամբ նախատեսված պետական գաղտնիքի),
• իրականացնել այլ լիազորություններ՝ սահմանված օրենքով։

Այն տեղեկությունները, որոնք չեն պատկանում հանրային տեղեկատվությանը, Հակակոռուպցիոն բյուրոն պահանջում է դատարանի որոշման հիման վրա։ Դատարանը որոշում է կայացնում դիմումը ներկայացնելուց հետո 48 ժամվա ընթացքում։ Հակակոռուպցիոն բյուրոյի դիմումը պետք է լինի հիմնավորված։ Այն պետք է նշի տեղեկատվության պահանջի հիմքը և նպատակը, պահանջվող տեղեկատվության ժամանակահատվածը և ծավալը։ Այս դիմումը բավարարելու դեպքում դատարանի որոշման մեջ պետք է նշվի տեղեկատվության պահանջի հիմքը և նպատակը, պահանջվող տեղեկատվության ժամանակահատվածը և ծավալը, ինչպես նաև տվյալ որոշման գործողության ժամկետը։

Օրենքով նախատեսված լիազորությունների իրականացման համար օրինագծով սահմանված է վարչական վարույթի սեղմ՝ 3-ամսյա ժամկետ։ Անհրաժեշտության դեպքում այս ժամկետը Հակակոռուպցիոն բյուրոյի պետի կողմից կարող է երկարաձգվել ոչ ավելի, քան 3 ամսով։

Բոլոր սուբյեկտները, որոնցից Հակակոռուպցիոն բյուրոն պահանջում է այս օրենքով նախատեսված տեղեկատվության ներկայացում, պարտավոր են նրան տրամադրել իրենց տրամադրության տակ եղած նշված տեղեկատվությունը։

Օրենքը սահմանում է արգելված դրամաշնորհի ստացման հետ կապված անձի հարցաքննության կարգն ու հիմքը, մասնավորապես՝

• Ֆիզիկական անձը, որը կարող է ունենալ Հակակոռուպցիոն բյուրոյի կողմից արգելված դրամաշնորհի ստացման մոնիտորինգի իրականացման համար անհրաժեշտ տեղեկատվություն, կարող է կամավոր հարցաքննվել հակակոռուպցիոն բյուրոյի կողմից։
• Արգելվում է անձին հարկադրել ապացույցներ ներկայացնելու կամ տեղեկատվություն տրամադրելու համար, նաև հարցաքննվող անձն իրավունք ունի իր հաշվին օգտվել փաստաբանի ծառայություններից, չտրամադրել տեղեկատվություն իր և/կամ մերձավոր ազգականի դեմ։ Հարցաքննվող անձի մերձավոր ազգական է համարվում նրա ծնողը, որդեգրողը, երեխան, զավակը, պապը, տատը, թոռը, քույրը, եղբայրը, ամուսինը։
• Հարցաքննվող անձը պարտավոր է հարցաքննության ժամանակ հակակոռուպցիոն բյուրոյին տրամադրել ճշգրիտ տեղեկատվություն, իր հերթին, Հակակոռուպցիոն բյուրոն պետք է գրավոր նախազգուշացնի հարցաքննվող անձին կեղծ տեղեկատվություն տրամադրելու համար սպասվող պատասխանատվության մասին, ինչպես նաև հարցաքննվող անձին պետք է բացատրվի մագիստրոս դատավորի մոտ հարցաքննության հնարավոր կանչի մասին։
• Նախատեսված է հարցաքննվող անձին նախնական ծանուցման հիման վրա հարցաքննության ժամանակ ձայնի և/կամ պատկերի գրանցող տեխնիկական միջոցների օգտագործում։

Հնարավոր է հարցաքննվող անձի հեռավար հարցաքննություն՝ էլեկտրոնային միջոցների օգտագործմամբ։ Իրավախախտման հետ կապված Հակակոռուպցիոն բյուրոյի լիազորված անձը կազմում է վարչական իրավախախտման արձանագրություն, որն անհապաղ ուղարկվում է շրջանային (քաղաքային) դատարան քննության համար։

Վարչական իրավախախտման համար օրենքով նախատեսված տույժի կատարմանը խոչընդոտող հանգամանքների հնարավոր առկայության դեպքում, Հակակոռուպցիոն բյուրոն իրավասու է վարչական իրավախախտման արձանագրություն կազմելու հետ միաժամանակ իրավախախտի գույքի վրա

(այդ թվում՝ բանկային հաշիվների) կիրառել արգելանք՝ համապատասխան իրավախախտման համար նախատեսված պատժամիջոցին համաչափ։ Արգելանքն անհապաղ ուժի մեջ է մտնում և վարչական իրավախախտման արձանագրության հետ միասին ներկայացվում է դատարան հաստատման։

Արգելանք դնելու հարցը քննարկվում է և որոշում է կայացվում նյութերը ներկայացնելուց հետո ոչ ուշ, քան 48 ժամվա ընթացքում: Դատարանի որոշումը մեկ անգամ բողոքարկվում է վերաքննիչ դատարանում՝ որոշումը ստանալուց հետո 48 ժամվա ընթացքում: Բողոքարկումը չի կասեցնում արգելանքի գործողությունը: Վերաքննիչ դատարանը որոշում է կայացնում բողոքը ներկայացնելուց հետո ոչ ուշ, քան 48 ժամվա ընթացքում: Այս որոշումը վերջնական է և ենթակա չէ բողոքարկման:

Դատարանը վարչական իրավախախտման արձանագրության հաստատման հարցը քննարկում է և որոշում է կայացնում նյութերը ստանալուց հետո 15 օրվա ընթացքում: Դատարանի որոշումը մեկ անգամ բողոքարկվում է վերաքննիչ դատարանում՝ որոշումը ստանալուց հետո 10 օրվա ընթացքում:

Սահմանված է սեղմված՝ 5-օրյա ժամկետ նախընտրական շրջանում վարչական իրավախախտման արձանագրության հաստատման հարցի քննարկման և որոշման համար: Դատարանի կողմից կայացված որոշումը մեկ անգամ բողոքարկվում է վերաքննիչ դատարանում՝ որոշումը ստանալուց հետո 72 ժամվա ընթացքում: Իր հերթին, վերաքննիչ դատարանի որոշումը վերջնական է և ենթակա չէ բողոքարկման:

Օրենքով սահմանված է իրավախախտում կատարելու 6-ամյա վաղեմության ժամկետ:

Օրենքը նախատեսում է արգելված դրամաշնորհի ստացման հետ կապված պատժամիջոցներ, մասնավորապես՝

• արգելված դրամաշնորհի ստացումը հանգեցնում է դրամաշնորհ ստացողի տուգանմանը՝ նշված դրամաշնորհի կրկնակի չափով,
• Հակակոռուպցիոն բյուրոյի կողմից ֆիզիկական անձի հարցաքննության կամ մագիստրոս դատավորի առջև հարցաքննության ժամանակ նշված անձի կողմից կեղծ տեղեկություններ տրամադրելը՝ հանգեցնում է 2 000 լարիի չափով տուգանման,
• վերոնշյալ որևէ գործողության կրկնակի կատարման համար սահմանված է համապատասխան իրավախախտման կատարման համար սահմանված պատժամիջոցի կրկնակի չափով տուգանք:

Մինչև օրենքի ուժի մեջ մտնելը տրված և ստացված դրամաշնորհների վրա կառավարության կամ նրա կողմից սահմանված լիազոր անձի/մարմնի համաձայնության կարգը չի տարածվի: