Ինչո՞ւ պետք է իմ զարմուհին ճնշվի այն պատճառով, որ իմ զարմուհին է. Էլիսաշվիլի

«Նեպոտիզմն այն է, երբ դու վերցնում ես բացարձակ անկիրթ, ոչ համապատասխան ունակություններով և ոչ մի որակավորում չունեցող մարդուն, միայն այն պատճառով, որ նա քո հարազատն ու բարեկամն է, և նրան ինչ-որ պաշտոնի ես նշանակում: Ինչ վերաբերում է զարմուհուս, ապա նա առաջին հերթին անկախ մարդ է, շատ բանիմաց ու պրոֆեսիոնալ։

Ի՞նչ անեմ, իմ զարմուհին է, բնությունն այդպես է որոշել։ Ինչու՞ պետք է իմ զարմուհին ճնշվի այն պատճառով, որ իմ զարմուհին է: Եթե ​​իմ զարմուհին պրոֆեսիոնալ է, ինչո՞ւ նա չպետք է կարիերա ունենա այս կյանքում:

Ոչ, անհարմար չեմ զգում։ Սա նրա որոշումն է, ոչ թե իմը: Ես ասացի, որ ես չեմ ուզում, որ նա հեռանա կուսակցությունից, նա շատ գործ ունի անելու, շատ աշխատասեր է և բանիմաց, ես չէի ուզում, որ նա հեռանա, բայց Լևանն առաջարկեց, և ես ասացի որ դա արդեն նրա որոշումն է: Հիմա ի՞նչ անեմ, որ իմ զարմուհին է, ինչո՞ւ պետք է անհարմար զգամ»,- ասել է Էլիսաշվիլին «Պալիտրանյուսի» եթերում։

Նոր հանրային պաշտպան Լևան Իոսելիանին ապրիլի 3-ին իր տեղակալներից մեկի պաշտոնում առաջադրել է Նաթիա Ջուլակիձեի թեկնածությունը։ Իոսելիանին ու Էլիսաշվիլին 2020 թվականին միասին հիմնել են «Քաղաքացիներ» կուսակցությունը և այս կուսակցությունից դարձել են խորհրդարանի անդամ։ 2021 թվականից Լևան Իոսելիանիի՝ ընդդիմադիր քվոտայով խորհրդարանի փոխխոսնակ ընտրվելուց հետո, Ջուլակիձեն աշխատել է Իոսելիանիի գրասենյակում որպես ավագ մասնագետ։

Ջուլակիձեն ասում է, որ հանրային պաշտպանի տեղակալի պաշտոնում նշանակվելը ոչ մի անհարմարություն չի առաջացնում և շահերի բախում չկա։

Ջուլակիձեն աշխատանքային փորձ ունի միայն Էլիսաշվիլիի և Իոսելյանի կողմից նախքան կուսակցությունը հիմնած քաղաքացիական շարժման մեջ, նա եղել է նախ նախագծի պատասխանատու, ապա՝ գործադիր տնօրեն։