«Ինձնից պահանջում էին, որ ասեմ` իբր ֆինանսավորվում եմ։ Հայտարարում եմ հացադուլ»,- ձերբակալված քաղաքացի

«Այս նամակը գրում եմ քննչական մեկուսարանից։ Ես ապօրինի կալանավորված եմ։ Նրանք ինձնից պահանջում են ստել և մարդկանց անուններ տալ՝ ձևացնելով, թե նրանք ինձ ֆինանսավորում են, և ես իրենց գործն եմ անում։ Ինձնից պահանջեցին նշել Ջափարիձեի, Խոշտարիայի, Գվարամիայի և այլ անձանց անունները։ Ոչ մի կերպ չեմ կարող նշել նրանց, քանի որ նման բան չկա։ Հայտարարում եմ հացադուլ։ Մենք միասին ենք հաղթելու այս ճակատամարտում»,- ասված է նամակում, որը տարածել է Ռեզո Կիկնաձեի փաստաբան Գուջա Ավսաջանիշվիլին։

ՆԳՆ գլխավոր քրեական ոստիկանության վարչության աշխատակիցները Ռեզո Կիկնաձեին ձերբակալել են Քրեական օրենսգրքի 225-րդ հոդվածի երկրորդ մասով, որը ենթադրում է խմբակային բռնության մասնակցություն և պատժվում է ազատազրկմամբ՝ 4-ից 6 տարի ժամկետով։

Բողոքի ակցիաների ընթացքում 16 մարդ ձերբակալվել է խմբակային բռնություն կազմակերպելու, ղեկավարելու կամ մասնակցելու և բռնի գործողությունների հրապարակայնորեն կոչ անելու համար։ Նրանցից 8-ի նկատամամբ Թբիլիսիի քաղաքային դատարանի կողմից որպես խափանման միջոց կիրառվել է կալանք։ Ձերբակալվածների թվում կան նաև 19, 20, 21 տարեկան երիտասարդներ։

Նոյեմբերի 28-ից Թբիլիսիի Ռուսթավելիի պողոտայում քաղաքացիները բողոքում են եվրաինտեգրման կասեցման վերաբերյալ «Վրացական երազանքի» որոշման դեմ։ Ինը օրվա ընթացքում ՆԳՆ-ն բազմիցս ցրել է խաղաղ ցուցարարներին՝ օգտագործելով ջրցան մեքենաներ, արցունքաբեր գազ և այլ հատուկ միջոցներ։ Քրեական և վարչական կարգով ձերբակալվել է ավելի քան 300 մարդ։ Նրանց մեծ մասին դաժան ծեծի են ենթարկել ոստիկաններն ու հատուկ ջոկատայինները։