Իրավիճակը Վրաստանում անհանգստացնող է. Եվրահանձնաժողովի նախագահը զրուցել է Զուրաբիշվիլիի հետ

«Եթե Վրաստանը ցանկանում է պահպանել իր ռազմավարական կողմնորոշումը դեպի Եվրամիություն, մեզ պետք են կոնկրետ գործողություններ կառավարության կողմից։ Մեր ընդլայնման զեկույցը ցույց է տալիս ճանապարհը»,- գրել է ֆոն դեր Լեյենը։

Սալոմե Զուրաբիշվիլին դեռ չի մեկնաբանել Եվրահանձնաժողովի նախագահի հետ զրույցը։

Վրաստանի Կենտրոնական ընտրական հանձնաժողովի տվյալներով՝ հոկտեմբերի 26-ին կայացած խորհրդարանական ընտրություններում «Վրացական երազանքը» ստացել է ձայների 53,93 տոկոսը։ Ընտրական շեմը հաղթահարած ընդդիմադիր կուսակցությունները չեն ճանաչում այս արդյունքի լեգիտիմությունը և բողոքի ակցիաներ են նախաձեռնում։

• «Կոալիցիա հանուն փոփոխությունների» - (11.037%)
• «Միասնություն-Ազգային շարժում» - (10․164%)
• «Ուժեղ Վրաստան» - (8․814%)
• «Գախարիան հանուն Վրաստանի» - (7․771%)

Նախագահ Սալոմե Զուրաբիշվիլին նույնպես կարծում է, որ ընտրությունները «ամբողջովին կեղծվել են», իսկ Վրաստանը «ռուսական հատուկ գործողության» զոհ է դարձել։

ԱՄՆ-ն ու Եվրամիությունը դեռ չեն շնորհավորել «Վրացական երազանքին» ընտրություններում տարած հաղթանակի կապակցությամբ։ ԵՄ արտաքին հարաբերությունների և անվտանգության քաղաքականության ներկայացուցիչ Ժոզեֆ Բորելն ասել է, որ ընտրությունները «աչքի են ընկել լուրջ խախտումներով», որոնք «պետք է հետաքննվեն թափանցիկ և անկախ»:

Ընտրություններից հետո չորրորդ օրը՝ հոկտեմբերի 30-ին, Եվրահանձնաժողովը հրապարակեց ընդլայնման տարեկան փաթեթը, որը գնահատում է տասը երկրների, այդ թվում՝ Վրաստանի առաջընթացը Եվրամիությանն անդամակցելու ճանապարհին։ Եվրահանձնաժողովը հայտարարում է, որ Վրաստանի անդամակցության գործընթացը դե ֆակտո կասեցվել է կառավարության գործողությունների պատճառով և խորհուրդ չի տալիս սկսել Վրաստանի հետ անդամակցության բանակցությունները, քանի դեռ երկիրը չի փոխել իր ընթացքը։