Իսրայելը հարվածել է Իրանի միջուկային ենթակառուցվածքին

Լրատվամիջոցների համաձայն՝ Իսրայելի ռազմաօդային ուժերի հարվածի հետևանքով զոհվել են Իրանի Իսլամական հեղափոխության պահապանների կորպուսի հրամանատար Հոսեյն Սալամը, զինված ուժերի շտաբի պետ, գեներալ-մայոր Մոհամմադ Բաղերին, միջուկային գիտնական և Իրանի ատոմային էներգիայի կազմակերպության նախկին ղեկավար Ֆերեյդուն Աբբասին, միջուկային ֆիզիկոս Մոհամմադ Մեհդի Թեհրանին, զինված ուժերի շտաբի պետի տեղակալ Ղոլամ Ալի Ռաշիդին, Իրանի Ազգային անվտանգության գործակալության նախկին ղեկավար Ալի Շամխանին։

Իսրայելի պաշտպանության ուժերը հայտարարել են, որ Իրանն ունի բավարար հարստացված ուրան՝ առաջիկա օրերին 15 միջուկային ռումբ արտադրելու համար, ինչը գոյության սպառնալիք է ներկայացնում Իսրայելի և աշխարհի համար։

Ըստ Իսրայելի պաշտպանության բանակի խոսնակ, գեներալ Էֆի Դեֆրինի, Իրանի վրա հարձակմանը մասնակցել է Իսրայելի ռազմաօդային ուժերի ավելի քան 200 ինքնաթիռ։ Իսրայելական կործանիչները հարվածել են Իրանում ավելի քան 100 թիրախների, այդ թվում՝ ռազմական և միջուկային օբյեկտների՝ ավելի քան 330 մարտագլխիկներով։

Իրանի կողմից սպասվող պատասխան գործողությունների պատճառով Իսրայելում հայտարարվել է արտակարգ դրություն։ Իսրայելի պաշտպանության բանակը զգուշացրել է բնակչությանը, որ երկրին սպասվում են «ուժեղ և դժվար օրեր»։

Իրանի Իսլամական Հանրապետության գերագույն առաջնորդ Այաթոլլա Ալի Խամենեին սպառնացել է Իսրայելին «կոշտ պատասխանով»։ Իրանը մոտ 100 անօդաչու թռչող սարք է արձակել Իսրայելի տարածք, և Իսրայելի պաշտպանության ուժերը աշխատում են դրանք հետ մղելու ուղղությամբ։

ԱՄՆ նախագահ Դոնալդ Թրամփը հայտարարել է, որ նախապես գիտեր, որ Իսրայելը կհարվածի Իրանին։

«Իրանը չի կարող միջուկային ռումբ ունենալ, և մենք հույս ունենք, որ կվերադառնանք բանակցությունների սեղանի շուրջ։ Կտեսնենք։ Ղեկավարության մեջ կան որոշ մարդիկ, ովքեր այլևս չեն վերադառնա», - ասել է Թրամփը Fox News-ին տված հարցազրույցում։

Նա ասել է, որ հետևում է ցանկացած պատասխան գործողության, և որ ԱՄՆ կենտրոնական հրամանատարությունը գտնվում է բարձր պատրաստվածության վիճակում։ Դոնալդ Թրամփի խոսքով՝ ԱՄՆ-ը պատրաստ է պաշտպանել իրեն և Իսրայելին, եթե Իրանը հակահարված իրականացնի։

Պետքարտուղար Մարկո Ռուբիոն հայտարարել է, որ Միացյալ Նահանգները ներգրավված չեն եղել Իսրայելի կողմից Իրանի վրա հարձակման մեջ։ Չնայած դրան, Իրանի արտաքին գործերի նախարարությունը մեղադրել է նաև Վաշինգտոնին։