Իվանիշվիլիի ընտանիքը մինչ այժմ անհայտ անշարժ գույք ունի Մոսկվայում․ լրագրողական հետաքննություն

Հետաքննության համահեղինակ «Թրանսփարենսի Ինթերնեշնլ-Վրաստանի» տեղեկություններով՝ Սոկոլ և Օդինցովո շրջաններում Իվանիշվիլիի ընտանիքին է պատկանում 2 առանձնատուն (795․6 և 614․5 քմ), որոնցից մեկը սահմանակից է 9 հարակից հողատարածքից բաղկացած 52 749 քմ տարածքով բակի՝ 3 ավտոտնակով և 9 օժանդակ շինություններով։ Հայտնաբերված գույքի հավանական շուկայական արժեքը կազմում է առնվազն 14․7 մլն դոլար։ Գույքերը գրանցված են Բիձինա Իվանիշվիլիի կնոջ՝ Էկատերինե Խվեդելիձեի, որդու՝ Ուտա Իվանիշվիլիի և ռուսական «Ակվա-Սփեյս» ՍՊԸ-ի անունով։

«Սա ևս մեկ անգամ հաստատում է, որ Ռուսաստանի հետ բոլոր կապերը խզելու Բիձինա Իվանիշվիլիի 2011 թվականի խոստումը, որը մինչ օրս հնչում է իշխող կուսակցության ղեկավարների կողմից, կեղծ էր։ Նրա ընտանիքը հարաբերությունները խզելու փոխարեն զբաղված է մոսկովյան սեփականության ընդլայնմամբ»,- ասում են «Թրանսփարենսի Ինթերնեշնլ-Վրաստանից»։

Լրագրողական հետաքննության տվյալներով՝ Մոսկվայի արվարձանում՝ Սոկոլ բնակավայրում գտնվող տան համասեփականատերը Ուտա Իվանիշվիլին է, ով, ըստ վրացական լրատվամիջոցների տեղեկությունների, դեռ Ռուսաստանի քաղաքացի է։ Հետաքննության տվյալներով՝ Իվանիշվիլիի ընտանիքը հիշյալ տունը վարձակալությամբ հանձնել է ռուս հայտնի ռեժիսոր Անդրեյ Պերշինին՝ (կեղծանունը՝ Ժորա Կրիժովնիկով) ամսական մոտ 9000 դոլարով։ Վարձակալությունը ապահովում է «Ակվա-Սփեյս» ՍՊԸ-ն, որը Բիձինա Իվանիշվիլիին է պատկանում Վիրջինյան կղզիներում գրանցված օֆշորային Vanity Overseas Limited-ի միջոցով։ Հետաքննության տվյալներով՝ «Ակվա-Սփեյսը» վարձակալությունից ստացված եկամուտների մեծ մասը փոխանցում է անձամբ Բիձինա Իվանիշվիլիի կնոջը՝ Էկատերինե Խվեդելիձեին։ Այս կերպ Էկատերինե Խվեդելիձեն 2022 թվականի սեպտեմբերից հետո ստացել է մոտավորապես 94 000 ԱՄՆ դոլար եկամուտ։

Բիձինա Իվանիշվիլին որպես վարչապետ 2013 թվականին ներկայացրած միակ հայտարարագրում նշել է Մոսկվայի ունեցվածքի մի մասը։ Սակայն լրագրողական հետաքննությամբ պարզվել է, որ գույքի մեծ մասը վերջին տարիներին ձեռք է բերվել և գրանցվել Էկատերինե Խվեդելիձեի անունով։ Մասնավորապես՝ Օդինցովո շրջանում 2021 թվականին նա ձեռք է բերել 2 լրացուցիչ կից հողամաս (9070 քմ ընդհանուր մակերեսով) մի քանի շինություններով, այդ թվում՝ 795․6 քմ մակերեսով սեփական բնակելի տուն, իսկ ընդամենը մի քանի ամիս առաջ՝ 2024 թվականի ապրիլի 19-ին՝ ևս 4500 քմ մակերեսով մեկ այլ կից հողատարածք։ Բացի այդ, Օդինցովոյի նստավայրի և 2024 թվականին գնված հողամասի նախկին սեփականատերը Բիձինա Իվանիշվիլիի զարմիկ Ուչա Մամացաշվիլին էր։

Լրագրողական հետաքննության հեղինակներն են «Կազմակերպված հանցավորության և կոռուպցիայի լուսաբանման նախագիծը» (SCOOP), «Թրանսփարենսի ինթերնեշնլ – Վրաստանը», «Ստուդիա մոնիտորը», «Կառավարման մոնիտորինգի կենտրոնը» (GMC), «Այ ֆակտը» և iStories-ը։ Նրանց տեղեկություններով՝ Բիձինա Իվանիշվիլին, նրա կինն ու որդին չեն արձագանքել մեկնաբանությունների խնդրանքին։