Կավելաշվիլին պնդում է, որ Վրաստանի եվրաինտեգրման գործընթացը շարունակվում է

Ըստ Կավելաշվիլիի, վերջին շրջանում եվրաինտեգրումը և արևմտամետ կուրսը հաճախ օգտագործվում են շահարկումների համար ինչպես ներքին, այնպես էլ միջազգային մակարդակում։

«Մենք ստիպված ենք եղել առնչվել բազմաթիվ շահարկումների հետ և գիտենք, որ այս ամենը, ցավոք, ծառայում է մեր հասարակության բևեռացմանը, հետևաբար դա վնասում է մեր երկրի շահերին, և մեր պարտքն է նման շահարկումներին հակադրել ճշմարտությունը։

Այսօր, չնայած երկրում ստեղծված արհեստական ​​աժիոտաժին և հզոր ապատեղեկատվական արշավին, Վրաստանի եվրաինտեգրման գործընթացը շարունակվում է։

Մինչև 2028 թվականը մենք կկատարենք ասոցացման համաձայնագրի ավելի քան 90 տոկոսը, իսկ մինչև 2030 թվականը մենք լավագույնս պատրաստ կլինենք անդամակցել Եվրամիությանը»,- ասել է Կավելաշվիլին, ով ընդդիմադիր կուսակցությունների և հինգերորդ նախագահ Սալոմե Զուրաբիշվիլիի կողմից լեգիտիմ չի ճանաչվել։

Նրա խոսքով՝ Վրաստանը պատրաստ է ցանկացած պահի սկսել ԵՄ անդամակցության բանակցությունները։

«Ցանկացած պահի մեր երկիրը պատրաստ կլինի մեկնարկել բանակցությունները և սկսել գործընթացը»,- հավելել է Միխեիլ Կավելաշվիլին։

Նա անդրադարձել է նաև Ամերիկայի Միացյալ Նահանգների հետ հարաբերություններին և ասել, որ «Վրացական երազանքը» ակնկալիքներ ունի՝ «նոր վարչակազմի օրոք բոլոր թյուրիմացությունները կվերացվեն»։

«Հիմա, ինչպես գիտեք, բավականին լարված իրավիճակ է աշխարհում, այդ թվում՝ մեր տարածաշրջանում։

Մեզ անհրաժեշտ է ավելի խելացի և պրագմատիկ գործողություններ, քաղաքական խորաթափանցություն, և ես վստահ եմ, որ նման ջանքերով մենք մեր երկիրը անպայման տանելու ենք դեպի խաղաղություն»,- դեսպաններին է դիմել Միխեիլ Կավելաշվիլին։

ԵՄ առաջնորդների ու կառույցների կարծիքով՝ Վրաստանի անդամակցության գործընթացը դե ֆակտո կասեցված է «Վրացական երազանքի» կառավարության գործողությունների պատճառով։ Այս մասին նշված է ընդլայնման զեկույցում, որը հոկտեմբերի 30-ին հրապարակել է Եվրահանձնաժողովը։ Եվրահանձնաժողովը պարզաբանել է, որ խորհուրդ չի տա սկսել Վրաստանի հետ անդամակցության բանակցությունները, քանի դեռ երկիրը չի փոխել իր կուրսը։ Զեկույցի հրապարակումից և խորհրդարանական ընտրությունների անցկացումից մեկ ամիս անց՝ նոյեմբերի 28-ին, «Վրացական երազանքը» հայտարարեց, որ մինչև 2028 թվականի վերջը օրակարգ չի մտցնի բանակցություններ սկսելու հարցը։ Այս որոշմանը հաջորդեցին զանգվածային բողոքի ցույցեր Թբիլիսիում և մարզերում։

Այս թեմայով՝

ԵՄ-ում պետք է քննարկենք Վրաստանի անդամակցության գործընթացի պաշտոնական կասեցման հարցը․ Բերբոք