Կոբախիձեի խոսքով` ռուսական օրենքի լիարժեք կիրառման գործընթացը շուտով կսկսվի

«Օրենքն այս փուլում ամբողջությամբ չի կիրառվում։ Նախընտրական շրջան էր, լուրջ վտանգ կար, որ ինչ-որ մեկը կարող էր օգտագործել այս օրենքի ամբողջական կիրառումը ընտրությունների դեմ շահարկումների համար, հետևաբար Արդարադատության նախարարության մոտեցումը մեղմ էր, որն ուներ կոնկրետ հիմք»,- ասել է Իրակլի Կոբախիձեն։

Հարցին, թե ե՞րբ է սկսվելու այն լրատվամիջոցների ու հասարակական կազմակերպությունների հարկադիր գրանցումը, որոնք ինքնակամ հրաժարվել են դա անել, Կոբախիձեն պատասխանել է.

«Իրականում, այս գործընթացը հավանաբար շուտով պետք է սկսվի, քանի որ այս «էնջեոների» թափանցիկությունը կարևոր է մեր երկրի և մեր պետական ​​շահերի համար։ Արդարադատության նոր նախարար է նշանակվել»,- ասել է Կոբախիձեն։

Ռուսական օրենքը, որը բողոքարկվել է Մարդու իրավունքների եվրոպական դատարանում, եկամուտի 20%-ից ավելին միջազգային կազմակերպությունների դրամաշնորհներից ստացած ոչ կառավարական կամ մեդիա կազմակերպություններին ճանաչում է որպես «օտարերկրյա ուժի շահեր կրողներ» և պարտավորեցնում գրանցվել։

Գրանցված սուբյեկտը պարտավոր է լրացնել և Հանրային ռեգիստրի ազգային գործակալություն ներկայացնել ֆինանսական հայտարարագիր։ Որպես «օտարերկրյա ուժի շահեր կրող կազմակերպություն» գրանցումից խուսափելը կամ սահմանված ժամկետում ֆինանսական հայտարարագիր չներկայացնելը կհանգեցնի 25 000 լարի տուգանքի։ Ներկայացման ընթացքում հայտնաբերված թերությունները չվերացնելու համար կազմակերպությունը կտուգանվի 10 000 լարիով, իսկ կրկնվելու դեպքում՝ 20 000 լարիով։ Տույժը չի ազատում կազմակերպությանը օրենքի պահանջների կատարումից։

«Օտարերկրյա ուժի շահեր կրող կազմակերպությանը» հայտնաբերելու կամ օրենքի որևէ պահանջի կատարումը ստուգելու նպատակով Հանրային ռեգիստրի ազգային գործակալության ֆինանսական հայտարարագրման բաժնի պետն իրավունք ունի վերահսկել և այդ գործընթացում գտնել անհրաժեշտ տեղեկատվությունը, ներառյալ անձնական տվյալները և գաղտնի տվյալները: Բոլոր այն անձինք, մարմինները, կազմակերպությունները, հիմնարկները, որոնց դիմում է ֆինանսական հայտարարագրման բաժնի պետը, պարտավոր են անհապաղ նրան ներկայացնել իրենց մոտ եղած նշված տեղեկությունները, հակառակ դեպքում կտուգանվեն 5000 լարիի չափով։

Եթե ​​մոնիտորինգի արդյունքում պարզվի, որ սուբյեկտը համապատասխանում է «օտարերկրյա ուժի շահերն իրականացնող կազմակերպության» համար սահմանված չափորոշիչներին, սակայն խուսափում է գրանցումից, ապա գործակալությունը ինքն այդ սուբյեկտին կգրանցի այսպես կոչված գործակալների ռեգիստրում։ Գրանցումը կազմակերպությանը չի ազատում տուգանքներից:

«Վրացական երազանքը» ռուսական օրենքն ընդունել է 2024 թվականի մայիսի 28-ին՝ հաղթահարելով նախագահի վետոն՝ երկրի միջազգային գործընկերների քննադատության և հասարակական բողոքի ֆոնին։ Արդյունքում Եվրամիությունը դե ֆակտո դադարեցրեց Վրաստանի անդամակցության գործընթացը, և Ամերիկայի Միացյալ Նահանգները սկսեց Վրաստանի հետ հարաբերությունների համապարփակ վերանայումը։