Քութայիսիի վերաքննիչ դատարանը չի բավարարել քվեարկության գաղտնիության խախտման վերաբերյալ բողոքները

«Ինչ զուգադիպություն է, որ երբ Թբիլիսիի վերաքննիչը հայտարարեց տեխնիկական ընդմիջում, այդ ընթացքում Քութայիսիի վերաքննիչը հայտարարեց իր որոշման մասին և ասաց, որ քվեարկության գաղտնիությունը չի խախտվել Արևմտյան Վրաստանում»,- գրել է «Վրաստանի երիտասարդ իրավաբանների ասոցիացիայի» նախագահ Նոնա Քուրդովանիձեն Ֆեյսբուքում։

«Իմ ձայնը» դիտորդական կազմակերպությունների կոալիցիան պահանջել է չեղյալ համարել Քութայիսիի ընտրատարածքային հանձնաժողովի 17, Զուգդիդիի 4, Բաթումիի 33, Խոբիի մեկ և Սենակիի 3 տեղամասերի արդյունքները, ինչպես նաև բարձրացրել է հանձնաժողովների անդամների կարգապահական պատասխանատվության հարցը, իսկ «Վրաստանի երիտասարդ իրավաբանների ասոցիացիայի» բողոքը վերաբերում էր Արևմտյան Վրաստանի բոլոր այն ընտրատեղամասերի արդյունքները անվավեր ճանաչելուն, որտեղ քվեարկությունն անցկացվել է տեխնոլոգիաների միջոցով: Դիտորդական կազմակերպությունները կարծում են, որ արդյունքներն անվավեր ճանաչելու հիմք են հանդիսացել ընտրությունների օրը հայտնաբերված խախտումները, որոնցից ամենալուրջը ընտրողի քվեարկության գաղտնիության իրավունքի խախտումն է։

Վերաքննիչ դատարանը միավորել է ոչ կառավարական կազմակերպությունների բողոքները և գործը քննել է հանձնարարել դատավորների կոլեգային, որի կազմում են Շոթա Սիրաձեն, Զազա Ռամիշվիլին և Խաթունա Խոմերիկին: Շոթա Սիրաձեն պարեկային ոստիկանության բաժնի տնօրեն Վաժա Սիրաձեի հայրն է։ 2012-2015 թվականներին եղել է Խոբիի սակրեբուլոյի անդամ «Վրացական երազանքից» և իրավական հարցերի հանձնաժողովի նախագահը։ Այդ հիմքով հայցվորը միջնորդել է նրան հեռացնել գործը քննող դատավորների կազմից, սակայն միջնորդությունը մերժվել է։

Թբիլիսիի վերաքննիչ դատարանում քննարկվում են խորհրդարանական ընտրություններում Արևելյան Վրաստանի ընտրատեղամասերում քվեարկության գաղտնիության խախտման վերաբերյալ բողոքները։