Լարված իրավիճակ է Բոլնիսիում, որտեղ ավտովթարից երկու անչափահաս է զոհվել

Տեղական InterPress.ge լրատվական գործակալությունը հայտնել է, որ ճանապարհատրանսպորտային պատահարը տեղի է ունեցել ժամը 20։00-ի սահմաններում։ Դեռահասներին վրաերթի է ենթարկել Mercedes-Benz մակնիշի ավտոմեքենան։ Նրանցից մեկը տեղում մահացել է, իսկ մյուսը՝ հիվանդանոց տեղափոխվելուց հետո։

Գյուղացիները շրջել են շտապօգնության մեքենան։ InterPress.ge-ի փոխանցմամբ՝ շտապօգնությունը վթարի վայր է ժամանել ուշացումով։ Բացի այդ, տեղի բնակիչները ֆիզիկական բռնության են ենթարկել ավտովթարի մասնակից վարորդին։

«Մառնեուլի» համայնքային ռադիոյի տեղեկություններով՝ «Ավերսի» կլինիկայի մոտ նույնպես քաղաքացիներ են հավաքվել ու կոտրել բուժհաստատության ապակիները։

ՆԳՆ-ից հայտնում են, որ պարեկային ոստիկանության Քվեմո Քարթլիի գլխավոր բաժնի ծառայողները ձեռնարկված օպերատիվ-որոնողական միջոցառումների և քննչական գործողությունների արդյունքում ձերբակալել են ճանապարհատրանսպորտային պատահարի մասնակից վարորդին՝ 2003 թվականին ծնված Թ.Չ.-ին։

«Հետաքննությամբ պարզվել է, որ նշված անձը իր ավտոմեքենայով չորս ուղևորների հետ երթևեկել է ճանապարհով, երբ տեղի է ունեցել ճանապարհատրանսպորտային պատահարը, ինչի հետևանքով զոհվել է ճանապարհը ոտքով անցնող երկու դեռահաս է՝ նրանցից մեկը տեղում, իսկ մյուսը՝ բուժհաստատությունում»,- ասված է ՆԳՆ հաղորդագրության մեջ։

Գործը քննվում է Քրեական օրենսգրքի 276 հոդվածով, որը ենթադրում է ճանապարհային երթևեկության անվտանգության կամ շահագործման կանոնների խախտում։