«Մենք գիտենք, թե դա ինչ է». Ալիևը՝ Վրաստանում ոչ կառավարական կազմակերպությունների ֆինանսավորման մասին

«Ես տեսնում եմ, որ Վրաստանում իրավիճակը կայունանում է, և մենք ուրախ ենք դրա համար։ Վրաստանը մեր ամենակարևոր գործընկերն ու մտերիմ բարեկամն է։ Երկար դարեր մեր ժողովուրդներն ապրել են խաղաղության և ներդաշնակության մեջ։ Ուստի Վրաստանի ապակայունացումը կամ ապակայունացման սպառնալիքը որքան վնասակար է Վրաստանի համար, նույնքան վնասակար է Ադրբեջանի համար։ Ուստի, մեր կողմից, մենք ամեն ինչ անում ենք, որպեսզի Վրաստանում իրավիճակը լինի քաղաքական հունի մեջ, կայուն, և Վրաստանը հաջողությամբ զարգանա»,- ասել է Ադրբեջանի նախագահը։

Այս համատեքստում Ալիևը նշել է արտաքին ազդեցությունը, խոսել արտերկրից ոչ կառավարական կազմակերպությունների ֆինանսավորման մասին և ասել, որ ԱՄՆ Միջազգային զարգացման գործակալությունը՝ USAID-ը պետք է արգելվի։

«Պարզվեց, որ Վրաստանում հազարավոր հասարակական կազմակերպություններ են գործում, որոնք ֆինանսավորվում են Արևմուտքի կողմից, և այդ կազմակերպություններում աշխատող կամ աշխատավարձ ստացող մարդիկ երևի տասնյակ հազարներ են, եթե ոչ ավելի։ Եվ մենք գիտենք, թե դա ինչ է, քանի որ այստեղ [Ադրբեջանում] կար ժամանակ, երբ «գրանտակերներն» ու գրանտ հատկացնողները իրենց ազատ էին զգում, բայց մենք դա դադարեցրինք։ Ուստի ցանկացած կառույցի կողմից տրվող դրամաշնորհը՝ լինի դա ադրբեջանական, թե արտասահմանյան, պետք է գրանցվի, պատկան մարմինները ստուգեն՝ թույլ տան, թե ոչ...

Մենք այդ ամենը կարգավորել ենք։ Օրինակ՝ ադրբեջանական լրատվամիջոցները չեն կարող ֆինանսավորվել օտարերկրյա աղբյուրից նույնիսկ 1%-ով։ Չի կարելի։ Ինչո՞ւ։ Մենք չենք ֆինանսավորում ԶԼՄ-ները ԱՄՆ-ում։ Ինչո՞ւ պետք է ֆինանսավորեն մեր լրատվամիջոցները։ Այսպիսով, իրենց ենթակա ռեսուրսներով, ինչպիսիք են «Ամերիկայի ձայնը» և «Ազատությունը», գիշեր-ցերեկ լափ են լցնում մեր ժողովրդի վրա, մեր երկրի վրա և ստվեր գցում Հայաստանի նկատմամբ տարած մեր հաղթանակի վրա։

Հետևաբար, կարծում եմ, որ Վրաստանում որոշ ժամանակ բաց թողնվեց, որպեսզի դա կարգավորվեր, և երբ դա արվեց, գնացքն արդեն մի փոքր գնացել էր, բայց լավ է, որ այժմ իրավիճակը գնում է դեպի կայունություն»,- ասել է Ալիևը՝ նշելով Ֆրանսիայի նախագահ Էմանուել Մակրոնի դերը՝ Վրաստանում տեղի ունեցող իրադարձություններին։

«Եվ նորից, տեսնում եք, որ Մակրոնի ականջները դուրս են ցցվել։ Ահա, մարդը չի կարող հանգստանալ սեփական երկրում, պետք է մտնի նաև Վրաստան»,- ասել է Իլհամ Ալիևը։

Ադրբեջանի նախագահի խոսքով՝ Վրաստանը կարևոր գործոն է «Կովկասի համար մղվող պայքարում»։

Վրաստանում անդադար, ամենօրյա բողոքի ակցիաներ են տեղի ունենում այն ​​բանից հետո, երբ նոյեմբերի 28-ին ոչ լեգիտիմ վարչապետ Իրակլի Կոբախիձեն հայտարարեց, որ «Վրացական երազանքը» Եվրամիությանն անդամակցելու շուրջ բանակցություններ սկսելու հարցը օրակարգ չի մտցնի մինչև 2028 թվականի վերջը։

Ներքին գործերի նախարարությունը տարբեր հիմքերով բազմիցս ցրել է խաղաղ ցուցարարներին և ձերբակալել շուրջ 500 մարդու, այդ թվում՝ ընդդիմության ներկայացուցիչների։ Ֆրանսիայի նախագահ Էմանուել Մակրոնը «Վրացական երազանքի» պատվավոր նախագահ Բիձինա Իվանիշվիլիի հետ հեռախոսազրույցում դատապարտել է քաղաքացիական հասարակության և ընդդիմության ներկայացուցիչների ահաբեկումը և պահանջել ազատ արձակել բոլոր կամայական ձերբակալվածներին։

Վերջին ամիսներին լայնածավալ բողոքի ակցիաների պատճառ դարձավ նաև «Վրացական երազանքի» կողմից կրկին նախաձեռնված և ընդունված «օտարերկրյա գործակալների» մասին ռուսական օրենքը, որի նպատակն է սահմանափակել անկախ քաղաքացիական հասարակությունը և լրատվամիջոցները։