Մենք պահանջում ենք չեղարկել ընտրությունների արդյունքները և նոր ընտրություններ նշանակել․ Բոկուչավա

Բոկուչավայի խոսքով՝ ընտրողի կատարած ընտրությունը «ամբողջովին տեսանելի» է եղել բոլոր քվեաթերթիկների վրա։

«Լրացուցիչ ծանրացուցիչ հանգամանք է այն, որ քվեարկության մեքենաների ճնշող մեծամասնության մոտ տեղադրվել է տեսախցիկ, որը շատ հեշտությամբ արձանագրել է քվեաթերթիկի հակառակ կողմում թողնված մարկերի հստակ տեսանելի հետքերը։ Ծանրացուցիչ հանգամանք է, որ ընտրատարածքային ընտրական հանձնաժողովի կողմից նշանակված «Վրացական երազանքի» ընտրատարածքի անդամը կանգնած էր հենց էլեկտրոնային քվեարկության մեքենայի մոտ, ով տեսահսկման հետ մեկտեղ ձեռքով վերահսկում էր ընտրողի ընտրությունը»,- ասել է Թինա Բոկուչավան։

Ընդդիմադիր կուսակցության նախագահը նշել է, որ ընտրությունների օրը, ընտրական այլ մանիպուլյացիաների միջոցով, ամենաշատ ձայները գողացվել են «Միասնություն-Ազգային շարժումից»։

«Սակայն սա չէ հիմնական շեշտադրումն այսօր, երբ ընտրություններն ու ընտրության իրավունքն ամբողջությամբ գողացվել են։ Ըստ այդմ, մենք պահանջում ենք անհապաղ չեղյալ համարել ընտրությունների արդյունքները և նշանակել նոր ընտրություններ, որտեղ ապահովված կլինի գաղտնիության և ազատ կամքի սկզբունքը»,- ասել է Բոկուչավան։

Վրաստանի երիտասարդ իրավաբանների ասոցիացիան վիճարկում է քվեարկության գաղտնիության սկզբունքի խախտումը և պահանջում չեղյալ համարել բոլոր 2263 տեղամասերի արդյունքները, որոնք անցկացվել են այս հիմքով։ Իրավապաշտպան կազմակերպությունը հայտնաբերել է քվեարկության գաղտնիության խախտման ռիսկերը ԿԸՀ-ի կողմից ընտրություններից առաջ անցկացված ուսումնական և տեղեկատվական հանդիպումներում և դիմել ԿԸՀ-ին՝ խնդրի վերացման ուղղությամբ համապատասխան միջոցներ ձեռնարկելու համար։ Սեպտեմբերի 28-ի նամակով ԿԸՀ-ն ՎԵԻԱ-ին հայտնել է, որ ուսումնա-տեղեկատվական հանդիպումների ժամանակ օգտագործված քվեաթերթիկը թեստային տարբերակ է, և քվեարկության օրը օգտագործված քվեաթերթիկի որակը տարբերվելու է, ինչը կապահովի գաղտնիությունը:

Կենտրոնական ընտրական հանձնաժողովի նախագահ Գիորգի Կալանդարիշվիլին հերքում է, որ ընտրությունների ժամանակ խախտվել է քվեարկության գաղտնիությունը։ «Ուղիղ կարող ենք ասել, որ ոչ ոք ոչ մի փուլում չէր կարող պարզել, թե կոնկրետ որ քաղաքական միավորման օգտին է քվեարկել ընտրողը։ Ես հասկանում եմ մտահոգությունը, որ քվեաթերթիկի կամ քվեաթերթիկների հակառակ կողմում կարող են լինել գունավորման հետքեր, արտահոսքի հետքեր, բայց դա ոչ մի դեպքում հնարավորություն չի տալիս հաստատել, որ ընտրողը քվեարկել է կոնկրետ սուբյեկտի օգտին»,- ասել է Կալանդարիշվիլին։

«Վրացական երազանքը» քվեաթերթիկում 18 քաղաքական կուսակցությունների շարքում եղել է ցուցակի վերջին տեղում։