Մոսկվան պատրաստ է շարունակել հարաբերությունների կարգավորումը Վրաստանի հետ․ Լավրով

«Վրաստանի ժողովուրդը կատարել է իր ընտրությունը, մենք պատրաստ ենք շարունակել երկկողմ հարաբերությունների կարգավորումը»,- ասել է Լավրովը «Ռիա Նովոստի» լրատվական գործակալությանը։

Խոսելով հոկտեմբերի 26-ի խորհրդարանական ընտրությունների մասին՝ Լավրովն ասել է, որ ԱՄՆ-ը և Եվրամիությունը արհեստականորեն փորձում են Վրաստանի ներկայիս ընտրական գործընթացը ներկայացնել որպես ռազմավարական ընտրություն Ռուսաստանի և Արևմուտքի միջև։

«Իրականում խոսքը ազգային շահերի վրա հիմնված ինքնիշխան զարգացման և դրսից կառավարման միջև ընտրության մասին է, ավանդական արժեքների և դրսից թելադրված նեոլիբերալ վերաբերմունքի միջև ընտրության մասին»,- ասել է Սերգեյ Լավրովը։

ՌԴ արտգործնախարարը հերքել է Ռուսաստանի միջամտությունը Վրաստանի ընտրություններին։ Նա մեղադրել է Արևմուտքին Վրաստանի ներքին գործերին «աննախադեպ» միջամտության, իշխանությունների և ընտրողների վրա ճնշում գործադրելու մեջ։

Վրաստանի ԿԸՀ-ի տվյալներով՝ «Վրացական երազանքի» օգտին քվեարկել է ընտրողների 53,93%-ը (1 120 011 ընտրող)։ Այս արդյունքի լեգիտիմությունը չեն ճանաչում ընտրական շեմը հաղթահարած ընդդիմադիր կուսակցությունները, որոնց միջև ձայները բաշխվել են հետևյալ կերպ.

• «Կոալիցիա հանուն փոփոխությունների» - (11.037%)
• «Միասնություն-Ազգային շարժում» - (10․164%)
• «Ուժեղ Վրաստան» - (8․814%)
• «Գախարիան հանուն Վրաստանի» - (7․771%)

Նախագահ Սալոմե Զուրաբիշվիլին նույնպես կարծում է, որ ընտրությունները «ամբողջովին կեղծվել են», իսկ Վրաստանը «ռուսական հատուկ գործողության» զոհ է դարձել։