Մշակույթի և սպորտի նախարարի պաշտոնում Թեա Ծուլուկիանիին կփոխարինի Թինաթին Ռուխաձեն

Այսօր կայացած ճեպազրույցում նոր նախարարին և նրա առաջին տեղակալին ներկայացրել է վարչապետ Իրակլի Կոբախիձեն։ Ինչպես ասել է վարչապետը, խորհրդարանական ընտրություններից անմիջապես հետո կառավարությունը կնախաձեռնի օրենսդրական փոփոխություն, ըստ որի՝ մշակույթի և սպորտի նախարարությունը կբաժանվեն։

«Մենք մեծ հաջողություններ ունենք սպորտի ոլորտում։ Վերջին տարիներին հատուկ ուշադրություն է դարձվում սպորտի զարգացմանը, իսկ սպորտի նախարարության առանձին ստեղծումը կլինի ուշադրության հերթական արտահայտում։ Սպորտը մնալու է առանձնահատուկ առաջնահերթություն, և դրա արտահայտությունը կլինի անկախ սպորտի նախարարության գոյությունը»,- ասել է Իրակլի Կոբախիձեն։

Վարչապետի խոսքով՝ սպորտի նախարարության առանձնացումից հետո Շալվա Գոգոլաձեն կզբաղեցնի սպորտի նախարարի պաշտոնը։

Մշակույթի և սպորտի նախարարի պաշտոնը թափուր է դարձել այն բանից հետո, երբ Թեա Ծուլուկիանին հրաժարական տվեց «Վրացական երազանքի» ընտրական ցուցակով առաջադրվելուց հետո։ Ընտրական օրենսգրքի համաձայն՝ խորհրդարանի անդամի թեկնածու գրանցվելուց հետո նախարարներն ազատվում են զբաղեցրած պաշտոններից։