Եվրոպական միության արտաքին գործերի և անվտանգության քաղաքականության գերագույն ներկայացուցիչ, Եվրոպական հանձնաժողովի փոխնախագահ Կայա Կալլասը և ընդլայնման հարցերով հանձնակատար Մարտա Կոսը համատեղ հայտարարություն են տարածել Վրաստանում ստեղծված իրավիճակի վերաբերյալ՝ նշելով, որ Մզիա Ամաղլոբելիի դեպքը ևս մեկ օրինակ է, թե ինչպես է «Վրացական երազանքը» վերաբերվում բոլոր նրանց, ովքեր ազատորեն արտահայտում են իրենց կարծիքը։
Լրահոս
Ընթերցողի ընտրանի
- 1 Ես կանեմ ամեն ինչ, որպեսզի Իվանիշվիլին կորցնի ամենաթանկը՝ փողն ու իշխանությունը. Գախարիա
- 2 Թբիլիսիի քաղաքապետարանը խուսափում է 16-ամյա տղայի մահվան դեպքի համար պատասխանատվությունից
- 3 Արդյո՞ք Վրաստանում թայլանդացի կանանցից բռնի կերպով ձվաբջիջներ են ձեռք բերում
- 4 Թրամփը առավելագույն ճնշում է գործադրելու Իրանի և Իրանի դաշնակից Իվանիշվիլիի ռեժիմի վրա․ Ուիլսոն
- 5 Բաթումիում խմբով հարձակվել են Գիորգի Գախարիայի վրա
- 6 ԱՄՆ-ն և Հայաստանը կստորագրեն ռազմավարական գործընկերության փաստաթուղթ
Եվրոպական միությունը կարծում է, որ Վրաստանի կառավարությունը ավելի է հեռանում ժողովրդավարական չափանիշներից։
«Վրաստանի կառավարությունն այլախոհությունը ճնշելու համար դիմել է ահաբեկման մարտավարության և բռնության: Խաղաղ ցույցերի մասնակիցները, լրագրողները և ընդդիմադիր քաղաքական գործիչներն իրենց հիմնարար իրավունքների իրացման համար դարձել են հետապնդումների թիրախ։
Ձերբակալված լրագրող Մզիա Ամաղլոբելիի գործը ևս մեկ օրինակ է, թե ինչպես է կառավարությունը վերաբերվում լրագրողներին և նրանց, ովքեր ազատորեն արտահայտում են իրենց կարծիքը: Ներկայումս հացադուլ անող Մզիան բոլոր անարդարացիորեն կալանավորվածների խիզախության խորհրդանիշն է։
Բռնության մեղավորները պետք է պատժվեն»,- ասված է հայտարարության մեջ։
Ուշադրություն է դարձվում նաև «Վրացական երազանքի» խորհրդարանի կողմից երկրում շարունակվող բողոքի ակցիաների ֆոնին արագացված կարգով ընդունված օրենսդրական փոփոխություններին, և նշվում է, որ դա լուրջ ազդեցություն կունենա վրաց հասարակության վրա։
«Փոփոխությունները հիմնովին կխաթարեն արտահայտվելու և հավաքների ազատության իրավունքները, ինչպես նաև լրատվամիջոցների ազատությունը:
Այս իրադարձությունները արտացոլում են Վրաստանի ժողովրդավարական զարգացման լուրջ հետընթաց և չեն արդարացնում ԵՄ թեկնածու երկրից սպասվող որևէ ակնկալիք:
Մենք իշխանություններին կոչ ենք անում դադարեցնել այդ միջոցառումները, ձեռնպահ մնալ լարվածության հետագա սրումից և սպասել ԵԱՀԿ/ԺՀՄԻԳ-ի եզրակացությանը, ինչպես պահանջել է հանրային պաշտպանը»,- ասված է հայտարարության մեջ։
Կայա Կալլասը և Մարտա Կոսը կոչ են անում Վրաստանի իշխանություններին ազատ արձակել բոլոր անարդարացիորեն կալանավորված լրագրողներին, ակտիվիստներին և քաղաքական հողի վրա կալանավորված անձանց, ապահովել երկխոսություն քաղաքական ուժերի և քաղաքացիական հասարակության ներկայացուցիչների հետ։
«Վերջին ընտրությունների վերաբերյալ ԵԱՀԿ/ԺՀՄԻԳ-ի զեկույցի առաջարկությունները պետք է հրատապ կատարվեն»,- ասված է հայտարարության մեջ։
Եվրոպական միությունն իր պատրաստակամությունն է հայտնում «աջակցելու Վրաստանի ժողովրդավարական, կայուն և եվրոպական ապագային ուղղված բոլոր ջանքերին»։
