Ընդդիմադիր կուսակցությունները «Վրացական երազանքի» կողմից «ԼԳԲՏ քարոզչության» դեմ օրինագծի նախաձեռնության մասին հայտարարությունը գնահատում են որպես երկրում առկա իրական խնդիրներից ուշադրությունը շեղելու փորձ։
Լրահոս
Ընթերցողի ընտրանի
- 1 ՌԴ արտաքին հետախուզությունը հայտնում է, որ ԱՄՆ-ը «գունավոր հեղափոխություն» է նախապատրաստում Վրաստանում
- 2 «Վրացական երազանքը» դադարել է երազանք լինելուց, այն դարձել է մղձավանջ. նախագահ
- 3 Թբիլիսիում երկաթուղային վթարի հետևանքով զոհվել է «Վրացական երկաթուղու» 2 աշխատակից
- 4 Ես պատրաստ եմ ստանձնել մեծ պատասխանատվություն, ներառյալ երկրորդ ժամկետով. Զուրաբիշվիլի
- 5 «Մենք ուժ կգտնենք մեր մեջ, որպեսզի ներողություն խնդրենք». Իվանիշվիլին՝ 2008 թվականի պատերազմի մասին
- 6 Հոկտեմբերին վրաց ժողովուրդը հնարավորություն կունենա հեռացնել խաբեբաներին․ սենատոր Ռիշ
«Վրաստանում ընտանիք չի մնացել, որ մարդիկ արտագնա աշխատանքի չեն մեկնել, կամ չեն դիտարկում այս հեռանկարը հենց այն հեռանկարի բացակայության, գործազրկության և թշվառության պատճառով, որի մեջ մտցրեց Իվանիշվիլիի 12-ամյա կառավարումը։ Սրանք այն իրական խնդիրներն են, որոնց մասին Իվանիշվիլիի կուսակցությունը պետք է խոսի, հոգ տանի և փորձի լուծել, բայց դրա փոխարեն մենք անընդհատ տեսնում ենք կարևորագույն թեմաներից ուշադրությունը շեղելու փորձեր։ Պետք է խորհրդարան բերել այնպիսի նախաձեռնություններ, որոնք պայքարում են գործազրկության, անհեռանկարայնության դեմ»,- ասել է «Միացյալ ազգային շարժման» անդամ Թինա Բոկուչավան։
«Լելո»-ի անդամ Սալոմե Սամադաշվիլին ասում է, որ «Վրացական երազանքի» նպատակն է, որ հասարակությունը քննարկումը տեղափոխի մտացածին խնդիրների վրա։ «Նախաձեռնությունը հենց դրան է ծառայում. ինչ-որ խնդիր հորինել, ապա դրա վրա ստեղծել մի ամբողջ PR արշավ»,- նշում է Սամադաշվիլին։
«Գիրչիի» անդամ Իագո Խվիչիան կարծում է, որ «Վրացական երազանքը», ըստ էության, մտադիր է սահմանափակել խոսքի ազատությունը։ Նրա խոսքով, փոխանակ կառավարող թիմն իրոք հոգ տանի եվրաինտեգրման գործընթացում առկա խնդիրների մասին, հորինել է «գոյություն չունեցող անհրաժեշտության թեմա»։
«Վրացական երազանքի» գործադիր քարտուղար և խորհրդարանական մեծամասնության առաջնորդ Մամուկա Մդինարաձեն փետրվարի 29-ին հայտարարել է, որ առաջիկա երկու շաբաթվա ընթացքում իրենք կնախապատրաստեն և կներկայացնեն օրենքի նախագիծ, որը «հասարակությանը կպաշտպանի կեղծ ազատական գաղափարախոսությունից և դրա անխուսափելի վնասակար հետևանքներից»։
«Մեր յուրաքանչյուր քաղաքացու իրավունքները սկզբունքորեն պետք է պաշտպանված լինեն և պաշտպանված կլինեն՝ անկախ ապրելակերպից, սակայն ոչ ավանդական ապրելակերպի կանխամտածված քարոզչությունն այն է, ինչի դեմ պայքարելը մեր պատասխանատվությունն է վրաց հասարակության և նրա ապագայի առաջ»,- ասել է Մդինարաձեն։
Ռուսաստանում մոտ երկու տարի է, ինչ գործում է «ԼԳԲՏ քարոզչությունն» ամբողջությամբ արգելող օրենքը։ Մինչ այդ՝ 2013 թվականից «ոչ ավանդական սեռական հարաբերությունների քարոզչությունը» արգելված էր միայն անչափահասների շրջանում։ Նախագահ Վլադիմիր Պուտինի կողմից 2022 թվականի դեկտեմբերի 5-ին ստորագրված օրենքի համաձայն՝ «ԼԳԲՏ քարոզչության» համար տուգանքը ֆիզիկական անձանց համար կազմում է 400 հազար ռուբլի, իսկ իրավաբանական անձանց համար՝ 5 միլիոն ռուբլի։ Օրենքը տարածվում է տարբեր ոլորտների վրա՝ ներառյալ առցանց և օֆլայն կինոթատրոնները, թատրոնը, լրատվամիջոցները, գովազդային բիզնեսը և սոցիալական ցանցերը։ «Ռոսկոմնադզորն» իրավունք ունի առանց դատարանի որոշման արգելափակել ինտերնետային ռեսուրսները, որոնք պարունակում են «ոչ ավանդական հարաբերությունների», մանկապղծության և սեռափոխության «քարոզչություն»։