Նեոնացիստների վրացի առաջնորդը ծրագրել է թունավորել հրեա երեխաներին. ԱՄՆ դատախազություն

Դաշնային դատախազության տվյալներով՝ Միխեիլ Չխիկիշվիլին մեղադրվում է հրեաների և ռասայական փոքրամասնությունների վրա զանգվածային հարձակում ծրագրելու, ինչպես նաև այլոց նմանատիպ բռնի գործողություններ կատարելուն խրախուսելու մեջ։ Նա հետախուզվում էր Ինտերպոլի կողմից, իսկ հուլիսի 6-ին ձերբակալվել է Մոլդովայում։

Մեղադրական եզրակացության համաձայն՝ Չխիկվիշվիլին Նյու Յորք՝ Բրուքլին է ժամանել տատիկի հետ 2022 թվականի հունիսին։ Ենթադրվում է, որ առնվազն հուլիսից նա ուրիշներին խրախուսել է բռնի ատելության հանցագործություններ և բռնության այլ գործողություններ կատարել «Մոլագար սպանությունների պաշտամունքի» անվան տակ, հիմնականում՝ գաղտնագրված բջջային հաղորդագրությունների հարթակների միջոցով: Մարդկանցից մեկը, ում հետ նա կապվել է, Հետաքննությունների դաշնային բյուրոյի (FBI) գաղտնի գործակալ էր: Դատախազության տվյալներով՝ 2023 թվականի սեպտեմբերին գաղտնի գործակալը նրան հարցրել է, թե ինչպես կարող է նա միանալ «Մոլագար մարդասպանության պաշտամունքին», ինչին, ըստ մեղադրական եզրակացության, Չհիկիշվիլին պատասխանել է, որ իրենք մարդկանց խնդրում են դաժան ծեծի, հրկիզման/պայթյունների տեսագրություններ նկարահանել, կամ սպանություններ, և որ «Թունավորումն ու հրկիզումը սպանության լավագույն տարբերակներն են»։

Դատախազության տվյալներով՝ 2023 թվականի նոյեմբերին Միխեիլ Չխիկիշվիլին սկսել է զանգվածային հարձակում ծրագրել, որը պետք է իրականացվեր Նոր տարում Նյու Յորք քաղաքում։ Սխեման ներառում էր Սանտա Կլաուսի հագուստ հագնել և թունավոր կոնֆետներ բաժանել ռասայական փոքրամասնություններին, այդ թվում՝ Բրուքլինի հրեական դպրոցների երեխաներին: Նա գաղտնի գործակալին մանրամասն հրահանգներ ու ձեռնարկներ է տվել ծրագրի իրականացման, ինչպես նաև թույնի պատրաստման համար։ Գործի նյութերի համաձայն՝ Չխիկվիշվիլիի կողմից գործակալին փոխանցված որոշ նյութեր կապված են եղել արմատական ​​իսլամիստական ​​ջիհադիստական ​​խմբավորումների և «Իսլամական պետություն» (ISIS) ահաբեկչական կազմակերպության հետ։

«Չխիկվիշվիլին մտադիր է եղել, որպեսզի ծրագրված հարձակումը լինի «ավելի մեծ գործողություն, քան Բրեյվիկինը»։ Նա նկատի ուներ նորվեգացի նեոնացիստ Անդերս Բերինգ Բրեյվիկին, ով 2011 թվականին Նորվեգիայում սպանել էր 77 մարդու։ Պնդում էր, որ ատելության հանցագործություններ է կատարել Բրուքլինում ապրելու ընթացքում 2022 թվականին: «Ուրախ եմ, որ սպանել եմ»,- պարծենում էր նա ու ասում, որ «ավելի շատ կսպաներ», բայց առաջին հերթին ուրիշներին է ստիպել սպանություն կատարել»,- ասել են Դատախազությունից։

Վրաստանի քաղաքացուն առաջադրված հանցագործությունները պատժվում են 50 տարվա ազատազրկմամբ։

Այսպես կոչված Մոլագար սպանությունների պաշտամունքը միջազգային ծայրահեղական խմբավորում է, որը, ըստ ԱՄՆ դատախազության, խթանում է բռնության ակտերը ռասայական փոքրամասնությունների, հրեական համայնքի և այլ խմբերի դեմ, որոնց նա համարում է «անցանկալի»: