Թբիլիսիում այցով գտնվող Հունգարիայի վարչապետ Վիկտոր Օրբանը հայտարարել է, որ Վրաստանում անցկացված խորհրդարանական ընտրություններն անցել են «ազատ և ժողովրդավարական», սակայն Եվրոպայում դեռ կլինեն վեճեր։ Նրա խոսքով՝ ինքը ծանոթացել է հունգարացի դիտորդների զեկույցին, որը «դրական է բոլոր առումներով»։
Լրահոս
Ընթերցողի ընտրանի
- 1 Ես կտրականապես դեմ էի առանց վիզայի ռեժիմի կասեցմանը, բայց փոխեցի իմ դիրքորոշումը․ Ռոթ
- 2 Մառնեուլիի սակրեբուլոյի փոխնախագահը մի քանի քվեաթերթիկ է լցրել արկղի մեջ, ընտրատեղամասը փակվել է
- 3 ԿԸՀ-ի նախնական արդյունքներով՝ ընտրություններում 53%-ով առաջատարը «Վրացական երազանքն» է
- 4 «Ֆորմուլայի» և «Մթավարիի» էքզիթ փոլերով ընտրություններում հաղթում է ընդդիմությունը, ըստ «Իմեդիի»՝ «Երազանքը»
- 5 Նախագահը չի ճանաչում ընտրությունների արդյունքները. հոկտեմբերի 28-ին Ռուսթավելիում հավաք է նախատեսվում
- 6 Ժամը 17:00-ի դրությամբ ընտրողների մասնակցությունը 50,06 տոկոս է
«Ես չէի ցանկանում նախընտրական քարոզարշավի ժամանակ գալ Վրաստան, քանի որ դա կընկալվեր որպես միջամտության փորձ։ Սպասեցինք արդյունքներին, հետո որոշեցի գալ Թբիլիսի։ Ցանկանում եմ շնորհավորել Վրաստանի վարչապետին ընտրություններում տարած հաղթանակի կապակցությամբ։ Ես հետևել եմ ընտրությունների արդյունքների հրապարակումից հետո շարունակվող հակասություններին, կարդացել եմ միջազգային արձագանքը, և կարող եմ ասել, որ ոչ ոք չհամարձակվեց ասել, որ այս ընտրությունները կամ դրանց արդյունքները որևէ կերպ ժողովրդավարական չեն, բացառությամբ քննադատական կարծիքի։ Ես ուսումնասիրել եմ հունգարացի դիտորդների ներկայացրած զեկույցը։ Դա դրական էր բոլոր առումներով՝ խոսվում էր ազատ ու ժողովրդավարական ընտրությունների մասին։ Այդ իսկ պատճառով ցանկանում եմ շնորհավորել Վրաստանի վարչապետին»,- ասել է Օրբանը Կոբախիձեի հետ համատեղ ասուլիսում։
Նրա խոսքով, ոչ ոք չի ցանկանում իր երկիրը ներքաշել անիմաստ պատերազմի մեջ, և այդ պատճառով նա հասկանում է «վրաց ժողովրդի կայացրած որոշումը»։
«Ուզում եմ հստակ ասել, որ վրաց ժողովուրդը խաղաղության նշան արեց, եվրոպական ընտրություն կատարեց։ Ես կարծում եմ, որ իշխող կուսակցությունը հավատարիմ է եվրաինտեգրմանը։ Դուք, հավանաբար, աշխարհի միակ երկիրն եք, որն իր սահմանադրության մեջ գրել է, որ բոլոր կառավարությունները պետք է ջանքեր գործադրեն ԵՄ-ին միանալու համար, և հավատարմությունը կասկածի տակ դնելն այս պայմաններում իսկապես ծիծաղելի է:
Նաև ուզում եմ շնորհավորել Վրաստանի կառավարությանը, որ այն պայմաններում, երբ դուք եվրոպամետ քաղաքականություն եք իրականացնում, ոչ մեկին թույլ չտվեցիք երկիրը վերածել մեկ այլ Ուկրաինայի։ Մենք մեծապես գնահատում ենք վարչապետի հավատարմությունը այս գաղափարին, և ես անձամբ համոզված եմ, որ մինչև տասնամյակի վերջ Վրաստանը լավագույն վիճակում պատրաստ կլինի դառնալ Եվրամիության անդամ երկիր։ Մենք ամեն ինչ կանենք ձեզ օգնելու համար:
Ընտրությունների արդյունքներն անվիճելի են, անցկացվեցին ազատ ու ժողովրդավարական ընտրություններ, բայց Եվրոպայում դեռ կլինեն վեճեր։ Պետք չէ դրան լուրջ վերաբերվել, քանի որ դա սովորական պատմություն է, Բրյուսելում միշտ այդպես է։
Երբ պահպանողական կուսակցությունները հաղթում են, մենք միշտ տեսնում ենք այս կարգի փաստարկներ, քանի որ եվրոպական քաղաքականությունը հիմնված է ձեռնարկի վրա. եթե լիբերալները հաղթում են, ապա դա ժողովրդավարություն է, եթե պահպանողականները հաղթում են, ապա ժողովրդավարություն չի եղել: Այսպիսի վեճեր Բրյուսելում անընդհատ լինում են։ Հունգարիայում ընտրություններ կանցկացվեն, թե որևէ այլ երկրում, նրանք այդպես են ընդունում և ընկալում»,- ասել է Վիկտոր Օրբանը։
Վիկտոր Օրբանը միակն է Եվրամիության անդամ 27 երկրների ղեկավարներից, ով շնորհավորել է Վրաստանի վարչապետին և իշխող կուսակցությանը ընտրություններում հաղթանակի կապակցությամբ։
Եվրամիությունը կոչ է արել Վրաստանի իշխանություններին արագ, թափանցիկ և անկախ հետաքննել և դիտարկել ընտրախախտումները։ Ինչպես ասել է ԵՄ բարձր ներկայացուցիչ Ժոզեֆ Բորելը, «սա անհրաժեշտ քայլ է ընտրական գործընթացի նկատմամբ վստահությունը վերականգնելու համար»։ Հետաքննության խնդրանքին միանում է նաև Ամերիկայի Միացյալ Նահանգները։
