Օսերն ու չեչենները միասին են դիմադրում Արևմուտքին. Գագլոևը՝ Գրոզնիում

Կադիրովը շնորհակալություն է հայտնել Գագլոևին անձամբ Գրոզնի ժամանելու համար և նրան պարգևատրել՝ «Չեչնիայի Հանրապետության հիմնադրման 100 տարվա» մեդալով։ Ինչպես նշել է նա, Հարավային Օսիան և Չեչնիան երկար տարիների մշակութային կապեր ունեն:

«Հարավային Օսիայի ժողովրդի մշակույթը յուրօրինակ է և եզակի։ Վերջերս Ցխինվալիում անցկացվեցին մեր հանրապետությանը նվիրված մշակույթի օրեր։ Այդ միջոցառումների շնորհիվ մենք ավելին ենք սովորում այլ մարդկանց ավանդույթների և սովորույթների մասին՝ ստեղծագործության, երաժշտության, թատրոնի և պարի միջոցով»,- ասել է Կադիրովը։

Ըստ Ալան Գագլոևի՝ փոխանակման մշակութային միջոցառումները չեչեն և օս ժողովուրդների եղբայրական հարաբերությունների ապացույցն են.

«Նման միջոցառումները հատկապես կարևոր են հիմա, երբ օս ու չեչեն մարտիկներն ուս ուսի տված կանգնած են ընդդեմ Արևմուտքի, որը փորձում է պառակտել Ռուսաստանը, և նրա ժողովրդին կեղծ արժեքներով հանել միմյանց դեմ»։

Դե ֆակտո իշխանությունների տեղեկություններով, Ռամզան Կադիրովի որոշմամբ, այսպես կոչված Հարավային Օսիայի ստեղծագործական կոլեկտիվները դրամական պարգևներ են ստացել. Կոստա Խետագուրովի անվան պետական ​​դրամատիկական թատրոնը ստացել է մեկ միլիոն ռուբլի, իսկ Գալաևի «Սիմդ» երգի և պարի պետական ​​անսամբլը՝ 2 միլիոն ռուբլի։

Ալան Գագլոևը և դե ֆակտո կառավարության այլ ներկայացուցիչները Չեչնիայում էին մայիսի 15-16-ը։ Այցի շրջանակներում Գագլոևն այցելել է Գուդերմես քաղաքում տեղակայված Ռուսաստանի հատուկ նշանակության ուժերի համալսարան։ Նրա խոսքով, ինքը դիտարկում է այն հնարավորությունը, որ այդ համալսարանում հարավօսական մարտիկներն էլ կարողանան բարձրացնել իրենց պատրաստվածության մակարդակը։