Ուկրաինացի լրագրողները Պուլիցերյան մրցանակ են ստացել

Ռուսաստանի կողմից 2022 թվականի փետրվարի 24-ին պատերազմ սկսելուց հետո, Չեռնովը, Մալոլետկան, Ստեպանենկոն և Հինանտին մնացել են պաշարված Մարիուպոլ քաղաքում, որտեղ միայն նրանք էին ներկայացնում միջազգային լրատվամիջոցները և ռեպորտաժներ պատրաստում խաղաղ բնակիչների կոտորածների մասին։

Մարիուպոլում գտնվող Associated Press-ի թիմը նաև մրցանակ է ստացել «Լրատվական լուսանկարչություն» անվանակարգում՝ ռուսական ներխուժման առաջին շաբաթվա ընթացքում արված եզակի կադրերի համար: Թիմի կազմում էր նաև Եվգենի Մալոլետկան։ Հենց նա է արել Ռուսաստանի կողմից Մարիուպոլի ծննդատան ռմբակոծությունը պատկերող հայտնի լուսանկարները։

The New York Times-ը Ուկրաինայում կատարած աշխատանքի համար մրցանակ է ստացել «Միջազգային ռեպորտաժ» անվանակարգում։ Հրատարակության լրագրողների թիմը ոչ միայն լուր է պատրաստել, այլև 8 ամիս աշխատելուց հետո հետաքննական նյութ է հրապարակել Բուչա քաղաքում ռուս զինվորականների կողմից խաղաղ ուկրաինացիների զանգվածային սպանությունների մասին։

Պուլիցերյան մրցանակը կրում է հրեա-հունգարական ծագումով ամերիկացի լրագրող և թերթ հրատարակող Ջոզեֆ Պուլիցերի անունը։ 1911 թվականին իր մահից հետո նա իր կարողությունը կտակել է Կոլումբիայի համալսարանին։ 1912 թվականին գումարի մի մասն ուղղվել է համալսարանում ժուռնալիստիկայի դպրոց բացելուն, իսկ մի մասը՝ Պուլիցերյան մրցանակի հիմնադրմանը, որն իր առաջին դափնեկիրներն ունեցել է 1917 թվականին։ Մրցանակաբաշխության խորհուրդը հիմնականում բաղկացած է ԱՄՆ խոշոր լրատվամիջոցների առաջատար խմբագիրներից կամ գլխավոր գործադիրներից: Մրցանակը տրվում է 23 անվանակարգերում, այդ թվում՝ արվեստի և գրականության։