Պապուաշվիլին հարձակվում է փորձագետների վրա, ովքեր կասկածի տակ են դնում Շովիի աղետի վերաբերյալ եզրակացությունը

«Այս կրիտիկական, ճգնաժամային պահին, երբ կարևոր է մոբիլիզացնելը, աջակցելը, ստուգված տեղեկատվության հրապարակումը, ցավոք, այս մի քանի օրվա ընթացքում ալիք բարձրացավ, փաստորեն Վրաստանը տեղեկատվական գրոհի տակ էր։

Մենք ունենք մեկ, երկու, երկրաբան, թե մասնագիտությամբ ինչ-որ մեկը, չգիտեմ, թե ով է այս օրերին հաճախ երևում հեռուստացույցով, հատկապես մի տիկին [Թեա Գոդոլաձեն]։ Մեկ-երկու այդպիսի մարդ ունենք, ովքեր ճգնաժամի ժամանակ խուճապ են առաջացնում բացարձակ ստերով։

Նրա ասածը բացարձակ սուտ էր։ Չգիտեմ գրագետ սուտ էր, թե անգրագետ տգիտություն, բայց այն, որ այնտեղ երկու օր ջրի կուտակում է եղել, ինքն էլ է դա ասել, իսկ մյուս լրատվամիջոցներից «Մթիս Ամբեբին» ասել է, թե իբր Բուբայի հովտում երկու օր ջուր չի եղել, կամ պակասել է, ինչը նույնպես սուտ էր։ Դա ուղղակիորեն գիտականորեն ապացուցված է։ Ճանճախի վրա տեղադրված է սենսոր, իսկ Ճանճախի վտակը Բուբա գետն է։ Ես տեսել եմ նաև այդ օրերի և ամիսների տվյալները և մինչև օգոստոսի 3-ը ջրի փոփոխություն չկա։ Այսպիսով, դա սովորական սուտ էր, երկրորդ սուտն ավելացվեց, որ այնտեղ, կարծես ինչ-որ բան այն չէ, ինչ-որ բաց լիճ է եղել, բացարձակ սուտ, որը տարածվել է այն էլ ինչ պահի, ճգնաժամի ժամանակ, և սա սովորական դիվերսիա է ու դանակ երկրի թիկունքից։

Նաև, իբր, եղել է Շրջակա միջավայրի ազգային գործակալության վերլուծություն, որը ցույց է տալիս, որ այդ հովտում սելավ է սպասվում, իրականում դա բացարձակ սուտ էր։

Ես մի քանի անգամ դիմել եմ «Կանաչ այլընտրանքին»՝ հերքելու այս սուտը և, ցավոք, նրանք ոչինչ չարեցին ու պահպանեցին այդ սուտը։

Նրանք ուղիղ գծել էին Դղվիորա գետը, որը մի քանի հարյուր մետր ներքև է, մյուս կողմում այս հովիտն է։ Այնտեղ ընդհանրապես ոչինչ չի եղել, եթե ինչ-որ բան եղել է, ապա դա Շովի հանգստավայրի հետ կապ չի ունեցել։ Հասկանալի է, որ մարդիկ երկրաբանություն չգիտեն, բայց մարդը դեռ պետք է աշխարհագրություն սովորի»,- ասել է Պապուաշվիլին։

Ռաճայում՝ Շովի հանգստավայրի տարածքում, օգոստոսի 3-ին սառցադաշտային հալոցքներից գոյացած սելավը գրեթե ամբողջությամբ ավերել է հանգստավայրը, մինչ այժմ հայտնաբերվել է 20 դի, որից պարզվել է 16-ի ինքնությունը։ Պաշտոնական տեղեկատվության համաձայն՝ 13-ը համարվում է անհետ կորած, այդ թվում՝ երեխաներ։

Շրջակա միջավայրի ազգային գործակալության նախնական եզրակացության համաձայն՝ 2023 թվականի օգոստոսի 3-ին Բուբիսծղալի գետի հովտում տեղի ունեցած աղետալի երկրաբանական և հիդրոօդերևութաբանական իրադարձությունները պայմանավորված են եղել սառցադաշտի ինտենսիվ հալմամբ, սառցադաշտի գլխին ժայռային ձնահյուսի փլուզմամբ, մթնոլորտային տեղումներով, սողանքային-էրոզիվ գործընթացներով և սառցադաշտային հոսքերի անցումով, որոնք կապված են միայն բնական գործոնների հետ։

Կառավարությունը պնդում է, որ այս ողբերգությունից խուսափել հնարավոր չէր։

«Կանաչ այլընտրանքի» տնօրեն Նինո Գուջարաիձեի խոսքով, խնդիրը կար առնվազն 9 տարի, ինչը բավական ժամանակ էր ամբողջ գետավազանում ակտիվ մոնիտորինգային միջոցառումներ պլանավորելու, վաղ ահազանգման համակարգեր տեղադրելու և արձագանքման պլաններ ստեղծելու համար, ինչը չի արվել։ Նրա խոսքով, եթե այս ամենը լիներ, մենք ամուր հիմք ունենք պնդելու, որ տուժողների տեսանկյունից նման արդյունք չէր լինի։

Սեյսմիկ մոնիտորինգի ազգային կենտրոնի տնօրեն Թեա Գոդոլաձեն նույնպես կարծում է, որ մեծ հավանականություն կա, որ մահից հնարավոր կլիներ խուսափել, եթե Բուբայի հովտում վաղ ահազանգման համակարգ ունենայինք:

«Մթիս Ամբիին» տված հարցազրույցում նույնը հաստատել է ջրաբան Նիկա Ծիթելաշվիլին, ով կասկածի տակ է դրել նախնական գնահատականում տրված եզրակացությունները։

Խորհրդարանի նախագահ Շալվա Պապուաշվիլին դեռ օգոստոսի 5-ին է «Մթիս Ամբեբիին» կոչ արել, թե ինչ տեղեկություն տարածել, և ինչ՝ ոչ, նա նաև պահանջել է ջնջել գրառումներից մեկը։ Նույն օրը «Վրացական երազանք» կուսակցության նախագահ Իրակլի Կոբախիձեն «Իմեդի» հեռուստաընկերության եթերում տմարդ է անվանել «Մթիս Ամբեբիի» խմբագրին։ Ավելի վաղ օգոստոսի 4-ի հրատարակության խմբագիր Գելա Մթիվլիշվիլիին Շովիում տեղի պաշտոնյան ասել էր, որ իրեն «ջուրը կնետի», եթե իրեն պատշաճ չպահի։ Ներքին գործերի նախարարության ռազմավարական հաղորդակցության վարչության պետ Քեթի Կովզիաշվիլին նույնպես դժգոհություն է հայտնել «Մթիս Ամբեբիի» աշխատանքի վերաբերյալ։

Ռաճայում տեղի ունեցած տարերային աղետի մասին տեղեկությունն առաջինը տարածել է «Մթիս Ամբեբին»։ Լրատվականի լրագրողներն առաջին իսկ օրվանից աշխատում են աղետի գոտում և շարունակական տեղեկություն են տրամադրում հանրությանը։