Պատգամավոր Իագո Խվիչիայի նկատմամբ բռնություն են գործադրել

«Այս ամենը «Վրացական երազանքի» և պատրիարքարանի կեղտոտ քարոզչության արդյունքն է։ Գրասենյակ եկավ մի մարդ, ում եղբորը ժամանակին «Բիբլիական ազատության» օգնությամբ ազատել ենք բանակից։ Հետո այս եղբայրը գնացել է Ամերիկա։ Հիմա մյուս եղբայրը, հայր Շալվայի և իր ընկերների քարոզչության պատճառով, որոշել է, որ մենք իր եղբորը կիսել ենք սատանայի հետ և եկել է գրասենյակ՝ հարց լուծելու։ Նա վիրավորում էր աշխատակիցներին, ես էլ միջամտել եմ, որի ժամանակ ձեռքով հարվածել է ինձ»,- լրագրողներին ասել է Խվիչիան։

Պատգամավորն ասում է, որ չի պատրաստվում համագործակցել հետաքննության հետ և հարձակվողի մասին ինքն է «հոգ տանելու»։

«Քանի որ մենք չենք վստահում դատարանին, ես գիտեմ, որ այս գործն ի վերջո կհասնի դատարան, և ես չեմ ցանկանում, որ ինչ-որ մեկին դատի Մուրուսիձեի դատարանը իմ բողոքի պատճառով»,- ասել է Խվիչիան։

Ներքին գործերի նախարարությունը դեպքի առթիվ հետաքննություն է սկսել քրեական օրենսգրքի 124-րդ հոդվածով, որը վերաբերում է առողջությանը անզգուշությամբ ոչ ծանր կամ ծանր վնասվածք հասցնելուն։ Հանցագործությունը պատժվում է տուգանքով կամ ուղղիչ աշխատանքով՝ առավելագույնը երկու տարի ժամկետով։

2017 թվականին «Գիրչի» կուսակցությունը հիմնել է «Վրաստանի քրիստոնեական, ավետարանական, բողոքական եկեղեցի - Բիբլիական ազատություն» կրոնական կազմակերպությունը, որն օգնում է 18-ից 27 տարեկան երիտասարդներին ազատվել մեկ տարվա պարտադիր զինվորական ծառայությունից։ Այդ նպատակով կազմակերպությունը ժամկետային զինծառայողներին տալիս է քահանայի վկայական, իսկ գործող օրենսդրությունը ցանկացած դավանանքի քահանաներին ազատում է զինվորական ծառայությունից: Տասնյակ հազարավոր երիտասարդներ օգտվել են «Բիբլիական ազատության» վկայականից, որն արժե 50 լարի։ 2025 թվականից ուժի մեջ կմտնի Վրաստանի պաշտպանության նոր օրենսգիրքը, և քահանաները կպարտավորվեն այլընտրանքային ծառայություն կատարել։