Պետությունից ստացած գումարն ամբողջությամբ կնվիրաբերեմ բարեգործությանը. Դվալիշվիլի

Դվալիշվիլին ասել է, որ ցանկանում է Վրաստանում բացել ջիու-ջիցուի և ըմբշամարտի մարզադահլիճներ, որտեղ երիտասարդները հնարավորություն կունենան մարզվել։

«Ես իսկապես չէի սպասում այս նվերին։ Դուք գիտեք, որ մենք պրոֆեսիոնալ մարզիկներ ենք, մենք պետության, ֆեդերացիայի և այլնի մաս չենք։ Այս ամենին մենք ինքնուրույն հասանք։ Շնորհակալություն այս նվերի համար: Այս գումարն ամբողջությամբ կնվիրեմ բարեգործությանը, Վրաստանում վրացական սպորտի և MMA-ի զարգացմանը»,- ասել է Դվալիշվիլին։

Այսօր հայտնի դարձավ, որ կառավարության որոշմամբ Մերաբ Դվալիշվիլիին և UFC-ի մեկ այլ վրացի չեմպիոն Իլիա Թոփուրիային կտրվի մեկ միլիոն լարի դրամական պարգև։ Ինչպես ասել է վարչապետ Իրակլի Կոբախիձեն, մարզական հաջողությունները և երկրի համար նվաճած հաղթանակը պատշաճ գնահատանքի կարիք ունեն։

33-ամյա Մերաբ Դվալիշվիլին սեպտեմբերի 15-ին հաղթել է ամերիկացի Շոն Օ՛Մելլիին և դարձել UFC-ի գերթեթև քաշային կարգի չեմպիոն։ Նա երեկ վերադարձել է Վրաստան ու չեմպիոնական գոտին բերել հայրենիք։

Ինչ վերաբերում է Իլիա Թոփուրիային, ապա նա այս տարվա փետրվարին նվաճել է կիսաթեթև քաշային կարգի չեմպիոնի կոչումը։ Վրաստանի նախագահը նրան պարգևատրել է Պատվո շքանշանով՝ Վրաստանում խառը մենամարտերի առաջմղման գործում ունեցած հատուկ ներդրման և սպորտային հաջող գործունեության համար։