«Վագների» հիմնադիր Եվգենի Պրիգոժինը հայտարարել է, որ իր վարձկանները, որոնք գտնվում են Ռուսաստանի մայրաքաղաքից 200 կիլոմետր հեռավորության վրա, վերադառնում են դաշտային ճամբարներ։
Լրահոս
Ընթերցողի ընտրանի
- 1 ՌԴ արտաքին հետախուզությունը հայտնում է, որ ԱՄՆ-ը «գունավոր հեղափոխություն» է նախապատրաստում Վրաստանում
- 2 «Վրացական երազանքը» դադարել է երազանք լինելուց, այն դարձել է մղձավանջ. նախագահ
- 3 Թբիլիսիում երկաթուղային վթարի հետևանքով զոհվել է «Վրացական երկաթուղու» 2 աշխատակից
- 4 Ես պատրաստ եմ ստանձնել մեծ պատասխանատվություն, ներառյալ երկրորդ ժամկետով. Զուրաբիշվիլի
- 5 Դեդոփլիծղարոյում արհեստական լճում ինքնազգացողությունը վատացած 16-ամյա դեռահասը մնում է կլինիկայում
- 6 Հոկտեմբերին վրաց ժողովուրդը հնարավորություն կունենա հեռացնել խաբեբաներին․ սենատոր Ռիշ
«Ուզում էին լուծարել «Վագներ» մասնավոր ռազմական ընկերությունը։ Հունիսի 23-ին մենք սկսեցինք «արդարության երթ» և ցերեկվա ու գիշերվա ընթացքում հասանք Մոսկվայից 200 կիլոմետր հեռավորության վրա։ Այս ընթացքում մեր մարտիկների ոչ մի կաթիլ արյուն չի թափվել։ Հիմա այն պահն է, երբ կարող է արյուն թափվել։
Ուստի մենք գիտակցում ենք ողջ պատասխանատվությունը այն բանի համար, որ կողմերից մեկում ռուսական արյուն է թափվելու, մեր շարասյունները հետ ենք տանում և, ըստ պլանի, գնում ենք հակառակ ուղղությամբ՝ դաշտային ճամբարներ»,- ասել է Պրիգոժինը ձայնային հաղորդագրության մեջ։
Նրա հայտարարությանը նախորդել էր Բելառուսի նախագահ Ալեքսանդր Լուկաշենկոյի մամուլի գրասենյակի տարածած տեղեկությունն այն մասին, որ Պրիգոժինը համաձայնել է դադարեցնել ավտոշարասյան շարժը դեպի Մոսկվա։
«Բանակցությունները շարունակվել են ողջ օրվա ընթացքում, ինչի արդյունքում համաձայնություն է ձեռք բերվել Ռուսաստանի տարածքում արյունալի ջարդերի անթույլատրելիության վերաբերյալ։ Եվգենի Պրիգոժինն ընդունել է Բելառուսի նախագահ Ալեքսանդր Լուկաշենկոյի առաջարկը՝ դադարեցնել «Վագների» զինյալների տեղաշարժը Ռուսաստանում և հետագա քայլեր ձեռնարկել լարվածությունը թուլացնելու համար։ Այս պահին սեղանին դրված է իրավիճակը կարգավորելու բացարձակապես շահավետ և ընդունելի տարբերակ՝ «Վագներ» մասնավոր ռազմական ընկերության մարտիկների համար անվտանգության երաշխիքներով»,- ասվում է Լուկաշենկոյի մամլո գրասենյակի հայտարարության մեջ։
Ռուսաստանի կառավարության ներկայացուցիչները դեռ չեն արձագանքել այս թեմայի շուրջ։
Հունիսի 23-ին «Վագների» հիմնադիր Եվգենի Պրիգոժինը Ռուսաստանի պաշտպանության նախարարությանը մեղադրել է «Վագների» ճամբարները ռմբակոծելու մեջ և խոստացել «արդարության երթ» սկսել։ Նրա խոսքով, 25 հազար «վագներական» պատրաստվում են պարզել, թե «ինչու է այս անկարգությունը տեղի ունենում երկրում»։
«Ռուսաստանի ռազմական ղեկավարության բերած չարիքին պետք է վերջ դրվի»,- ասել է Պրիգոժինը։ Նա հանդիպում է պահանջում պաշտպանության նախարար Սերգեյ Շոյգուի և Գլխավոր շտաբի պետ Վալերի Գերասիմովի հետ։
Հունիսի 24-ին «Վագները» վերահսկողություն է սահմանել Դոնի Ռոստովում՝ Ուկրաինայի սահմանի մոտ գտնվող ռազմական օբյեկտների, այդ թվում՝ օդանավակայանի վրա և սկսել շարժվել դեպի Մոսկվա։
Վլադիմիր Պուտինը Պրիգոժինի գործողությունները գնահատել է որպես «դանակի հարված թիկունքից» և խոստացել, որ բոլորը, ովքեր «բռնել են դավաճանության ճանապարհը», կպատժվեն «անխուսափելի պատժով»։
«Ով կազմակերպել և նախապատրաստել է ռազմական ապստամբություն, ով զենք է բարձրացրել իր ծառայակիցների վրա, դավաճանել է Ռուսաստանին՝ դրա համար պատասխան է տալու։ Կոչ եմ անում նրանց, ում փորձում են ներքաշել այս հանցագործության մեջ, չանել ճակատագրական ու ողբերգական սխալ, կատարել միակ ճիշտ ընտրությունը՝ դադարեցնել հանցավոր գործողություններին մասնակցելը»,- ասել է Պուտինը։
Ռուսաստանի կառավարությունը հակաահաբեկչական գործողության ռեժիմ է հայտարարել Մոսկվա քաղաքում, Մոսկվայի և Վորոնեժի շրջաններում։ Անվտանգության դաշնային ծառայությունը զինված հեղաշրջման փորձի մեղադրանքով քրեական գործ է հարուցել Պրիգոժինի դեմ։