Պուտինի հրամանագրով անցկացվող փառատոնին մասնակցում է նաև վրացական պատվիրակությունը

Մոտ 40 հոգուց բաղկացած պատվիրակությունը գլխավորում է Պրիմակովի վրաց-ռուսական համայնքային կենտրոնի տնօրեն Դիմիտրի Լորթքիփանիձեն։ Պատվիրակության մեջ է ներառված նաև Լալի Մորոշկինան, ով որպես քաղաքագետ հարցազրույցներ է տալիս ռուսական լրատվամիջոցներին։

«Կարծում եմ՝ այս փառատոնը դարակազմիկ է։ Այն, ինչ կատարվում է այստեղ, շատ կարևոր է, քանի որ, օրինակ, վրացի երիտասարդներից շատերն առաջին անգամ են հանդիպել իրենց եղբայրներին հետխորհրդային տարածքից։ Նման հարթակ նախկինում չկար։ Որպես քաղաքագետ, հակամարտությունների հարցերով նախկին փոխնախարար՝ ես հասկանում եմ, որ այն ամենից հետո, ինչ մենք անցել ենք, շատ կարևոր է երկխոսություն սկսելը։ Մենք երկու քրիստոնեական երկիր ենք։ Միասին լինելը մեր ճակատագիրն է»,- քարոզչական լրատվամիջոցներից մեկին ասել է Լալի Մորոշկինան։

Փառատոնի շրջանակներում տեղի է ունեցել ՌԴ ԱԳՆ պաշտոնական ներկայացուցիչ Մարիա Զախարովայի մամուլի ասուլիսը, դասախոսություններով են հանդես եկել ՌԴ նախագահի մամուլի խոսնակ Դմիտրի Պեսկովը և Ռուսաստանի Դաշնության Անվտանգության խորհրդի նախագահի տեղակալ Դմիտրի Մեդվեդևը։ Երիտասարդներին հանդիպել է նաև պրոպագանդիստ Մարգարիտա Սիմոնյանը։ Փառատոնին ներկա է եղել նաև Ռուս ուղղափառ եկեղեցու պատրիարք Կիրիլը, ով պատասխանել է երիտասարդների հարցերին։

Փառատոնն անցկացվում է մարտի 1-7-ը։ Ռուսական լրատվամիջոցների փոխանցմամբ՝ այսօր Վլադիմիր Պուտինը կհանդիպի մասնակիցներին և հանդես կգա ելույթով։

Պուտինը «Համաշխարհային երիտասարդական փառատոնի» կազմակերպման մասին հրամանագիր է արձակել անցյալ տարի։ 2017 թվականից հետո փառատոնն այս տարի անցկացվում է առաջին անգամ։ Ռուսաստանի նախագահի աշխատակազմի ղեկավարի առաջին տեղակալ Սերգեյ Կիրիենկոն հայտնել է, որ դրան մասնակցում է 20 հազար մարդ աշխարհի 190 երկրներից։