Rusiya prezidenti Vladimir Putinin sərəncamı ilə Soçidə keçirilən “Ümumdünya Gənclər Festivalı”nda Gürcüstan nümayəndə heyəti də iştirak edir.
Əsas xəbərlər
Təxminən 40 nəfərdən ibarət nümayəndə heyətinə Primakov adına Gürcü-Rus İcma Mərkəzinin direktoru Dimitri Lortkipanidze rəhbərlik edir. Buraya politoloq kimi Rusiya mətbuatına müsahibə verən Lali Moroşkina da daxildir.
“Düşünürəm ki, bu festival epoxaldır. Burada baş verənlər çox əhəmiyyətlidir, çünki məsələn, bir çox gürcü gənci postsovet məkanından olan qardaşları ilə ilk dəfə görüşdülər. Belə bir platforma əvvəllər yox idi. Bir politoloq, münaqişə məsələləri üzrə keçmiş nazir müavini kimi başa düşürəm ki, bütün yaşadığımızdan sonra dialoqa başlamaq çox vacibdir. Biz iki xristian ölkəsiyik. Birlikdə olmaq bizim taleyimizdir”, - Lali Moroşkina təbliğat mediasından birinə deyib.
Festival çərçivəsində Rusiya Xarici İşlər Nazirliyinin rəsmi nümayəndəsi Mariya Zaxarovanın mətbuat konfransı keçirilib, Rusiya prezidentinin mətbuat katibi Dmitri Peskov və Rusiya Federasiyası Təhlükəsizlik Şurasının sədr müavini Dmitri Medvedev mühazirələr oxuyublar. Təbliğatçı Marqarita Simonyan da gənclərlə görüşüb. Festivalda Rus Pravoslav Kilsəsinin Patriarxı Kiril iştirak edib və gənclərin suallarını cavablandırıb.
Festival 1-7 mart tarixlərində keçirilir. Rusiya mətbuatının məlumatına görə, bu gün Vladimir Putin iştirakçılarla görüşəcək və onlara müraciət edəcək.
Putin “Ümumdünya Gənclər Festivalı”nın təşkili ilə bağlı sərəncamı ötən il verib. 2017-ci ildən sonra festival bu il ilk dəfə keçirilir. Rusiya Prezidenti Administrasiyası rəhbərinin birinci müavini Sergey Kiriyenko bildirib ki, burada dünyanın 190 ölkəsindən 20 min nəfər iştirak edir.
