Ռուսական «Դալեներգոմաշը» 30 տարի անց առաջին անգամ սարքավորումներ կարտահանի Վրաստան

«Շնորհիվ այն բանի, որ Խորհրդային Միության տարիներին այնտեղ [Վրաստանում] հանքային պարարտանյութեր արտադրող քիմիական գործարան կառուցվեց, կապերը մնացել են, մենք դրանք թարմացրել ենք և աշխատում ենք», - Խաբարովսկի հեռուստաալիքի հետ զրույցում ասել է «Դալեներգոմաշի» արտահանման բաժնի մենեջեր Ալեքսանդր Միկուշովը։

Հեռուստաընկերության տեղեկություններով՝ Ռուսաստանի դեմ պատժամիջոցների կիրառումից հետո ընկերությունը խնդիրներ է ունեցել բանկային փոխանցումների հարցում, սակայն նրան հաջողվել է հարմարվել և այժմ բոլոր պայմանագրերը կնքվում է ռուբլով։ Բացի այդ, մասնագետներին անհրաժեշտ է եղել մշակել լոգիստիկ նոր շղթա:

«Երբ խոսքը խոշոր ապրանքների մասին է, ինչպիսիք են, օրինակ՝ ազոտի գազի գեներատորը քիմիական գործարանի համար, առաքումը դեպի նպատակակետ՝ Ղազախստան, Վրաստան կամ Ուզբեկստան կատարվում է մեքենաներով, իսկ Հնդկաստան՝ հիմնականում բեռնարկղերով, ծովով»,- ասել է Միկուշովը։ Ինչպես ասել է նա, այս տարի վրացական ձեռնարկության հետ «մեծ պայմանագիր» է կնքվել։

Ձեռնարկության գլխավոր ինժեներ Վյաչեսլավ Կոնդրատյուկն ասել է, որ Խարկովի (Ուկրաինա) «Գիպրոկոկս» նախագծով խորհրդային տարիներին կառուցված մետալուրգիական գործարաններում գեներատորները փոխարինելը շատ դժվար է։ «Դրա համար մինչ այժմ մեր գեներատորներն օգտագործվում են, մասեր են առաքվում։ Մեքենաներն աշխատում են 50 տարի»,- ասել է գլխավոր ինժեները։

«Դալեներգոմաշը» մասնագիտացած է կոմպրեսորների, ճնշման և էլեկտրական սարքավորումների արտադրության մեջ մետալուրգիական համալիրների և քիմիական արդյունաբերության գործարանների համար: Ձեռնարկությունը սարքավորումներ է մատակարարում տասնյակ երկրների, այդ թվում՝ Բելառուսին, Բուլղարիային, Հնդկաստանին և Իրանին։