Լրահոս

Ինքնաթիռների, Իսկանդերների, «Կինժալների» և X-101 թևավոր հրթիռների կիրառմամբ հարվածներ են հասցվել Խարկովի, Վիննիցայի, Սումիի, Լվովի, Զապորոժիեի և Դնեպրոպետրովսկի շրջաններում։

«Ուկրէներգո» պետական ​​ընկերության ղեկավար Վլադիմիր Կուդրիցկիի գնահատմամբ՝ Ուկրաինայի էներգետիկ համակարգի վրա իրականացվել է ամենամեծ հարձակումը, որը բնութագրվել է համակցված զենքի կիրառմամբ։

«Շատ շրջաններում տուժել են էներգետիկ օբյեկտները, հատկապես, ցավոք, Խարկով քաղաքում, որտեղ վնասի մասշտաբներն ավելի մեծ են, քան այլուր»,- ասել է Կուդրիցկին։

Հարձակում է տեղի ունեցել նաև Դնեպրի հիդրոէլեկտրակայանի վրա, որը Ուկրաինայի ամենամեծ հիդրոէլեկտրակայանն է։ Կայանում հրդեհ է բռնկվել, սակայն իրավիճակը վերահսկելի է։ Վլադիմիր Կուդրիցկիի խոսքով՝ ամբարտակի ճեղքման վտանգ չկա։

Ուկրաինայի նախագահ Վլադիմիր Զելենսկիի խոսքով՝ անցած գիշեր հարձակմանը մասնակցել են ավելի քան 60 «Շահեդ» անօդաչու թռչող սարքեր և 90 տարբեր տեսակի հրթիռներ։ Զելենսկին հիշեցրել է միջազգային գործընկերներին, որ, ի տարբերություն Ուկրաինայի օգնության, ռուսական հրթիռները ուշացումներ չունեն։

«Կարևոր է հասկանալ ուշացման և հետաձգված որոշումների արժեքը։ «Պատրիոտ» համակարգերը պետք է պաշտպանեն Խարկովն ու Զապորոժիեն։ ՀՕՊ-ն անհրաժեշտ է մարդկանց, ենթակառուցվածքների, տների և ամբարտակների պաշտպանության համար: Գործընկերները հստակ գիտեն, թե ինչ է անհրաժեշտ: Նրանք իսկապես կարող են աջակցել: Անհրաժեշտ է ընդունել այդ որոշումները»,- ասել է Զելենսկին։

Ռուսաստանի հարձակումը հանգեցրել է նաև զոհերի։ Առկա տեղեկության համաձայն՝ Զապորոժիեում առնվազն 3 մարդ զոհվել է, 14-ը՝ վիրավորվել, 3-ը համարվում է անհետ կորած։