Ռուսաստանին ձեռնտու օրենքի քննարկմանը Աբխազիայում հաջորդել են բողոքի ցույցեր, ընդդիմադիրներ են ձերբակալվել

Ըստ տեղական մի քանի Telegram ալիքների՝ ձերբակալվածները բողոքում էին Ռուսաստանի կառավարության հետ ներդրումային համաձայնագրի վավերացման դեմ, իսկ այսպես կոչված իշխանական ալիքները հաղորդում են, որ ընդդիմադիրները հեղաշրջման փորձ էին նախապատրաստում, մասնավորապես, նոյեմբերի 8-ին, երբ քննարկվում էր փաստաթղթի վավերացման հարցը, «սադրիչները բախում էին նախապատրաստում իրավապահների հետ և փորձում ներխուժել խորհրդարանի շենք»։

Ընդդիմադիրների ձերբակալության մասին այսպես կոչված Պետական ​​անվտանգության ծառայությունը դեռ տեղեկություն չի հրապարակել։

«Այսօր ձերբակալվել են մեր ընկերները։ Ինչի՞ հիման վրա են կալանավորվում քաղաքական գործիչները։ Ձերբակալությունները կատարվել են այնպես, կարծես նրանք առանձնապես վտանգավոր հանցագործներ են։ Եթե ​​կանչեին Պետական ​​անվտանգության ծառայություն, իրենք կգային։ Սա ցույց է տալիս, որ, գիտակցելով լեգիտիմության իսպառ բացակայությունը, Ասլան Բժանիան որոշել է ինչ-որ մեկին վախեցնել նման իբր ահաբեկիչ մեթոդներով, սակայն Աբխազիայում դա միշտ հակառակ էֆեկտն է ունեցել»,- ասել է այսպես կոչված ընդդիմության առաջնորդներից Ադգուր Արձինբան։ Նրա խոսքով՝ ձերբակալվածների թվում կան երկու նախկին «պատգամավորներ»։

Նոյեմբերի 8-ին Աբխազիայում ռուս իրավաբանական անձանց կողմից ներդրումային նախագծերի իրականացման մասին համաձայնագիրը քննարկվել է դե ֆակտո խորհրդարանի միջազգային հարաբերությունների հանձնաժողովի ընդլայնված նիստում, որի արդյունքում որոշվել է, որ հարցը քննարկման համար կներկայացվի խորհրդարանին։

Համաձայնագրի ընդդիմախոսները նշում են, որ ռուս ներդրողների համար արտոնյալ հարկային ռեժիմը, որը նախատեսում է փաստաթուղթը, կոչնչացնի տեղի ձեռներեցներին։ Դե ֆակտո խորհրդարանի ընդդիմադիր պատգամավոր Կան Կվարչիան ասել է, որ համաձայնագիրը ռուս ներդրողներին Աբխազիայում բնակարաններ կառուցելու հնարավորություն կտա։ Նրա խոսքով, գործադիր իշխանությունն այս հարցում հաշվի չի առել խորհրդարանի մեծամասնության կարծիքը։