«Սնուցման վերականգնումն ընթանում է առանց բարդությունների». Զուրաբ Չխաիձեն՝ Մզիա Ամաղլոբելիի մասին

«Տիկին Մզիան դադարեցրել է հացադուլը և այժմ սնուցման վերականգնման գործընթացում է։ Այս գործընթացում մենք առաջնորդվում ենք միջազգայնորեն ճանաչված պրոտոկոլով: Բուժող բժշկի հետ ներգրավված է էնդոկրինոլոգ-դիետոլոգ։ Սույն պրոտոկոլի համաձայն՝ նրան տրամադրվում է համապատասխան կալորիականությամբ հարուստ սնունդ և զուգահեռաբար անցկացվում են լաբորատոր հետազոտություններ։

Ընդհանուր վիճակը, կարելի է ասել, այս փուլում բավարար է, և սնուցման վերականգնման գործընթացն ընթանում է առանց որևէ բարդության»,- ասել է Չխաիձեն։

Մզիա Ամագլոբելին կալանքի տակ է հունվարի 12-ից։ Բաթումիի ոստիկանապետ Իրակլի Դգեբուաձեին ապտակելու համար նրան մեղադրանք է առաջադրվել ոստիկանի վրա հարձակվելու հոդվածով, որը պատժվում է 4-ից 7 տարի ազատազրկմամբ։

Լրագրողի շահերը պաշտպանում են Վրաստանի երիտասարդ իրավաբանների ասոցիացիայի փաստաբանները և BLB իրավաբանական ընկերության ավագ գործընկեր, Թբիլիսիի նախկին դատախազ Մայա Մծարիաշվիլին: Մզիա Ամաղլոբելիի նկատմամբ որպես խափանման միջոց կալանքը վերացնելու նրանց միջնորդությունը քաղաքային և վերաքննիչ դատարանները չեն քննարկել։ Փաստաբաններն ասում են, որ քրեական հետապնդումն անօրինական է և հավասարազոր է քաղաքական բռնաճնշումների։

Մզիա Ամաղլոբելին Ռուսթավիի թիվ 5 կանանց քրեակատարողական հիմնարկից փետրվարի 4-ին տեղափոխվել է «Վիվամեդ» կլինիկա։ Սնուցումը վերսկսելու որոշումը նա կայացրել է փետրվարի 18-ին՝ հացադուլի 38-րդ օրը։