Սոչիից մեկնող զբոսաշրջային նավը կանգ է առել Բաթումիի նավահանգստում

«Շատ գեղեցիկ բնություն ունեք, բուսաբանական այգին յուրահատուկ է, պատրաստվում ենք տեսնել։ Մենք չգիտենք օկուպացիայի մասին, դուք մեր ինչ-որ հանրապետություններից էիք, միություն ու ոչ օկուպացված։ Ռուսաստանը օկուպանտ չէ, մենք ի՞նչ է, ձեզ օկուպացրե՞լ ենք։ Մենք օգնում էինք ձեզ: Մենք ձեզնից ազատեցինք Աբխազիան։ Նրանք մեզանից օգնություն խնդրեցին։ Դուք տանկերով մտաք այնտեղ, և մենք տեսանք այդ տանկերը։ Ես Աբխազիայում էի, տեսա տներ առանց պատուհանների, քանի որ դրանք բոլորը քանդվել էին ձեր կողմից։ Ռուսաստանը օգնեց Աբխազիան ազատել ձեզնից»,- լրագրողներին ասել է զբոսաշրջային նավի ուղևորներից մեկը։

Զբոսաշրջային նավը նավարկում է Պալաուի դրոշի ներքո։ Վրաստանի ծովային տրանսպորտի գործակալության տվյալներով՝ նավը Բաթումիի նավահանգիստ է մտել Տրապիզոնից, և դրա սեփականատեր ընկերությունը ներառված չէ միջազգային պատժամիջոցների մեջ։

«Նավը շահագործում է թուրքական զբոսանավային Miray Cruises International ընկերությունը, նավի սեփականատերը գրանցված է Սեյշելյան կղզիներում Goodwin Shipping Limited անունով և ներառված չէ միջազգային պատժամիջոցների մեջ։

Եթե ​​նավը կամ նավի սեփականատերը պատժամիջոցների ցանկում է, ապա չի թույլատրվում մուտք գործել Վրաստանի նավահանգիստներ և իրականացնել համապատասխան ընթացակարգեր»,- հայտնել են ծովային տրանսպորտի գործակալությունից՝ նշելով, որ զբոսաշրջային նավի մուտքը կոմերցիոն բնույթ է կրում։

Astoria Grande-ն Սոչիի նավահանգստից դուրս է եկել հուլիսի 22-ին։ Այս տարի առաջին անգամ Բաթումին ընդգրկվել է մեկշաբաթյա զբոսաշրջային երթուղում։ Ինչպես հաղորդում է ռուսական պետական ​​հեռուստաալիքը, որոշ ուղևորներ հատուկ են ընտրել այս ուղղությունը՝ Բաթումին տեսնելու համար։

Եվս մեկ նման շրջագայություն կանցկացվի հուլիսի 29-ից օգոստոսի 5-ը։ Astoria Grande-ն, որում կլինեն ռուսական էստրադայի երգիչներ, Սոչիից կմեկնի Տրապիզոն, այնուհետև կմտնի Բաթումիի նավահանգիստ, որտեղից կվերադառնա Թուրքիա և կանգ կառնի Ամասրայում և Ստամբուլում։ Ստամբուլից նավը կվերադառնա Սոչի։