Լրահոս

Ուբիսա-Շորապանի հատվածում աշխատանքներն իրականացնում է Ճանապարհային դեպարտամենտի կապալառու ընկերությունը՝ «Չինաստանի ճանապարհների և կամուրջների կորպորացիան»։ Հատվածը ներառում է 13 կիլոմետր ճանապարհ, 27 կամուրջ և 18 թունել։

Դեպարտամենտի տեղեկատվության համաձայն՝ Ուբիսա-Շորապանի հատվածում, 10-րդ կիլոմետրում գտնվող սողանքային լանջին ընթացող շինարարական գործընթացում նախագծով նախատեսվում է կատարել լանջի ամրացման (խարսխման) համալիր աշխատանքներ։

«Աշխատանքների ընթացքում, նախքան լանջի, այսպես կոչված, տեռասավորում-ամրացումը, վերջին շրջանում տեղացած առատ տեղումների հետևանքով ակտիվացած սողանքային գործընթացները շարժել են լանջի հատվածներից մեկի ժամանակավոր կառուցված մակերեսը, որը վնասել է արտաքին բետոնե հատվածը:

Ներկայումս ընթանում են լանջերի մաքրման աշխատանքները, որից հետո կվերսկսվի նախագծով նախատեսված աշխատանքների իրականացումը։

Շինհրապարակը ընթացքի մեջ է և, բնականաբար, աշխատանքները ավարտված չեն։ Համապատասխանաբար, շինարարական ընկերությանը վճարումը կկատարվի աշխատանքներն ամբողջությամբ ավարտվելուց և վերահսկիչ ընկերության կողմից կատարված աշխատանքների հաստատումից և ընդունելուց հետո»,- ասվում է ավտոճանապարհային դեպարտամենտի հայտարարությունում։

Ռիկոթի մայրուղու շինարարությունը նախատեսվում է ավարտել մինչև տարեվերջ։ Կառուցվում է մինչև 51,6 կիլոմետր երկարությամբ, 4 գոտի ունեցող արագընթաց մայրուղի, որը ներառում է 97 կամուրջ և 51 թունել։ Շինարարական աշխատանքների ընդհանուր արժեքը կազմում է շուրջ 2,6 մլրդ լարի։