Ստիպված եմ հրապարակավ կոչ անել վարչապետին հրավիրել Անվտանգության խորհուրդ․ նախագահ

«Ծանոթացա մեր Պաշտպանության ուժերի հրամանատար, գեներալ-մայոր Մաթիաշվիլիի տրամադրած տեղեկատվությանը Ռուսաստանում տեղի ունեցող զարգացումների մասին։ Ցավոք, ես չկարողացա անհրաժեշտ տեղեկություն ստանալ որևէ այլ պատասխանատու պետական ​​կառույցից, ոչ էլ ներքին գործերի նախարարից, որը պատասխանատու է մեր սահմանը վերահսկելու համար, միևնույն ժամանակ, որպես Անվտանգության խորհրդի քարտուղար, ընդհանուր առմամբ, պետք է տիրապետի տեղեկության և ինձ հետ կիսվի երկրի անվտանգության մասին կարևոր տեղեկություններով, ոչ էլ Պետական ​​անվտանգության ծառայության ղեկավարից, որի ուղղություններից մեկը, համաձայն իր գերատեսչության օրենքի, երկիրն արտաքին սպառնալիքներից պաշտպանելն է, նույնիսկ՝ հետախուզական ծառայության ղեկավարից, որն օրենքով ուղղակիորեն պատասխանատու է արտաքին սպառնալիքներն ու ռիսկերը որոշելու և երկրի պետական ​​պաշտոնյաներին անհրաժեշտ հետախուզական տեղեկատվություն տրամադրելու համար։

Ոչ միայն տեղեկություն ստանալ չհաջողվեց, այլև հնարավոր չեղավ կապվել նրանց հետ, ինչն ինքնին տագնապալի է այս իրավիճակում, երբ աշխարհի ուշադրությունը հնարավորինս մոբիլիզացված է ընթացիկ իրադարձությունների վրա։ Ուստի, ես ստիպված եմ հրապարակավ կոչ անել վարչապետին անհապաղ հրավիրել Անվտանգության խորհրդի նիստ։

Կարծում եմ, որ այսօր կան մի քանի կարևոր հարցեր, որոնք պետք է քննարկվեն այս ձևաչափով։ Ժամանակը սպառվում է՝ մեկը սահմանային հսկողությունը խստացնելն ու վիզային ռեժիմը վերանայելն է, մյուսը՝ սահմանին պատժամիջոցների ենթարկված անձանց ցուցակների կիրառումն է, որոնք կան և մեր գործընկերները վերահսկում են այդ ցուցակները։ Տեղեկատվական վակուում չպետք է ստեղծվի, քանի որ հանրությունը պետք է ժամանակին և մանրամասն ստանա իր անհրաժեշտ ողջ տեղեկատվությունը երկրի անվտանգության պաշտպանությանն ուղղված կառավարության ձեռնարկած միջոցառումների մասին, որպեսզի չստեղծվի ոչ անհիմն մտավախություններ, ոչ էլ, ինչպես հաճախ է պատահում, տեղեկատվական վակուումի պայմաններում չտարածվեն կեղծ տեղեկություններ։

Նաև խորհուրդը պետք է հաշվի առնի Աբխազիայի և Ցխինվալիի ներկայիս արձագանքները, որպեսզի անջատողականներին թույլ չտա օգտագործել այդ իրադարձությունները բնակչության շրջանում Վրաստանի նկատմամբ անտեղի վախեր առաջացնելու համար: Մեր քաղաքականությունը չի փոխվել ու չի փոխվելու, Վրաստանը չի պատրաստվում ուժով տարածքներ վերադարձնել։ Սա պետք է ասել ու կրկնել։ Վերջապես, անհրաժեշտ է շարունակել տեղեկության փոխանակումը և սերտ շփումը մեր գործընկերների հետ»,- ասել է Սալոմե Զուրաբիշվիլին։

Ներքին գործերի նախարարությունն այսօր հայտարարություն է տարածել, որում նշվում է, որ ստեղծված իրավիճակը վերլուծվում է, և այս փուլում Ռուսաստանի հետ սահմանը փակելու կամ այլ միջոցներ ձեռնարկելու կարիք չկա։ Մինչ այդ «Վրացական երազանքի» նախագահ Իրակլի Կոբախիձեն ասել էր, որ «մենք պետք է հետևենք Ռուսաստանում տեղի ունեցող զարգացումներին, դա միակ բանն է, որ պետք է անենք»։ Ո՛չ վարչապետ Իրակլի Ղարիբաշվիլին, ո՛չ էլ նախարարների կաբինետի անդամները չեն արձագանքել այս թեմային։

Հունիսի 23-ին «Վագների» հիմնադիր Եվգենի Պրիգոժինը Ռուսաստանի պաշտպանության նախարարությանը մեղադրել է «Վագների» ճամբարները ռմբակոծելու մեջ և խոստացել «արդարության երթ» սկսել։ Նրա խոսքով, 25 հազար «վագներական» պատրաստվում են պարզել, թե «ինչու է այս անկարգությունը տեղի ունենում երկրում»։

«Ռուսաստանի ռազմական ղեկավարության բերած չարիքին պետք է վերջ դրվի»,- ասել է Պրիգոժինը։ Նա հանդիպում է պահանջում պաշտպանության նախարար Սերգեյ Շոյգուի և Գլխավոր շտաբի պետ Վալերի Գերասիմովի հետ։

Այս պահին «Վագները» վերահսկում է ռազմական օբյեկտները Դոնի Ռոստովում՝ Ուկրաինայի սահմանի մոտ, այդ թվում՝ օդանավակայանը։ Ռուսաստանի մայրաքաղաքից մոտ 400 կիլոմետր հեռավորության վրա գտնվող Լիպեցկի շրջանում նկատվել է դեպի Մոսկվա շարժվող «վագներականների» ավտոշարասյունը։ Շրջանի նահանգապետը հորդորել է բնակիչներին չլքել տները։

Եվգենի Պրիգոժինի ապստամբությունից հետո այսօր առավոտյան քաղաքացիներին է դիմել ՌԴ նախագահ Վլադիմիր Պուտինը։ Նա Պրիգոժինի գործողությունները գնահատել է որպես «դանակի հարված թիկունքից» և խոստացել, որ բոլորը, ովքեր «բռնել են դավաճանության ճանապարհը», կպատժվեն «անխուսափելի պատժով»։

«Ով կազմակերպել և նախապատրաստել է ռազմական ապստամբություն, ով զենք է բարձրացրել իր ծառայակիցների վրա, դավաճանել է Ռուսաստանին՝ դրա համար պատասխան է տալու։ Կոչ եմ անում նրանց, ում փորձում են ներքաշել այս հանցագործության մեջ, չանել ճակատագրական ու ողբերգական սխալ, կատարել միակ ճիշտ ընտրությունը՝ դադարեցնել հանցավոր գործողություններին մասնակցելը»,- ասել է Պուտինը։

Ռուսաստանի կառավարությունը հակաահաբեկչական գործողության ռեժիմ է հայտարարել Մոսկվա քաղաքում, Մոսկվայի և Վորոնեժի շրջաններում։ Անվտանգության դաշնային ծառայությունը զինված հեղաշրջման փորձի մեղադրանքով քրեական գործ է հարուցել Պրիգոժինի դեմ։