Թրամփը, ամենայն հավանականությամբ, պետքարտուղարի պաշտոնում կնշանակի սենատոր Մարկո Ռուբիոյին

53-ամյա Ռուբիոն Սենատի անդամ է ընտրվել 2010 թվականին։ Նա ներկայում հետախուզության կոմիտեի նախագահի տեղակալն է և արտաքին հարաբերությունների հանձնաժողովի ավագ անդամը։ Մարկո Ռուբիոն համարվում է «բազե» արտաքին քաղաքականության ուղղությամբ, այսինքն՝ կոշտ դիրքորոշման կողմնակից, հատկապես Չինաստանի, Իրանի, Վենեսուելայի և Կուբայի նկատմամբ։

Ըստ Reuters-ի՝ «Ուկրաինայի ճգնաժամը կլինի Ռուբիոյի օրակարգի հիմնական մասը»։ Վերջին հարցազրույցներում նա ասել է, որ Ուկրաինան պետք է ավելի շատ կենտրոնանա Ռուսաստանի հետ բանակցելու ուղիներ գտնելու, քան վերջին տասնամյակում Ռուսաստանի կողմից գրավված տարածքները վերադարձնելու վրա։

Դրա հետ մեկտեղ, Մարկո Ռուբիոն այն 15 հանրապետական ​​սենատորներից մեկն էր, ովքեր ապրիլին դեմ քվեարկեցին Ուկրաինային 95 միլիարդ դոլար արժողությամբ ռազմական օգնության փաթեթին: Փաթեթն ընդունվել է 46 դեմոկրատների, 31 հանրապետականների և 2 անկախ սենատորների աջակցությամբ։

Ինչպես գրում են արևմտյան լրատվամիջոցները, Ռուբիոն մեղմացրել է իր խիստ մոտեցումը Թրամփի հետ աշխատելուն զուգահեռ։ «Ես Ռուսաստանի կողմից չեմ, բայց, ցավոք, իրականությունն այն է, որ Ուկրաինայում պատերազմը կարող է ավարտվել բանակցությունների միջոցով»,- սեպտեմբերին NBC-ին ասել է Ռուբիոն:

Եթե ​​լրատվամիջոցներում տարածված տեղեկությունը հաստատվի, ապա Մարկո Ռուբիոն կլինի առաջին լատինաամերիկացին, ով կզբաղեցնի ԱՄՆ գլխավոր դիվանագետի պաշտոնը։

Դոնալդ Թրամփը և նրա վարչակազմը կսկսեն աշխատանքը հունվարին՝ երդմնակալությունից հետո։