Թրամփն ու Շեյնբաումը քննարկել են Մեքսիկայի սահմանով ԱՄՆ-ում միգրացիայի հարցը

«Նա համաձայնել է դադարեցնել միգրացիան Մեքսիկայով դեպի Միացյալ Նահանգներ՝ փաստացի փակելով մեր հարավային սահմանը», - չորեքշաբթի ասել է Թրամփը՝ Մեքսիկայի նախագահի հետ հեռախոսազրույցից հետո։

Շեյնբաումը արագ արձագանքել է, որ Մեքսիկայի դիրքորոշումը սահմանները փակելը չէ:

«Երբ ես խոսեցի նախագահ Թրամփի հետ, ես նրան բացատրեցի այն բարդ ռազմավարությունը, որին հետևում է Մեքսիկան՝ լուծելու միգրացիայի խնդիրը՝ հարգելով մարդու իրավունքները», - գրել է Մեքսիկայի նախագահը X հարթակում։

Ինչպես նշել է նա, միգրանտների քարավանները չեն հասնում հյուսիսային կամ ԱՄՆ սահման, քանի որ նրանց մասին հոգ է տանում Մեքսիկան։

«Մենք կրկնում ենք, որ Մեքսիկայի դիրքորոշումը սահմանները փակելը չէ, այլ կառավարությունների և ժողովուրդների միջև կամուրջներ կառուցելը»,- ասել է Մեքսիկայի առաջին կին նախագահը։ Շեյնբաումն այս պաշտոնում ընտրվել է հոկտեմբերին։

ԱՄՆ նախագահի պաշտոնում երկրորդ ժամկետով ընտրված Դոնալդ Թրամփի վարչակազմը կսկսի աշխատել հունվարի 20-ին՝ երդմնակալությունից հետո։ Ներգաղթը Թրամփի 2024 թվականի քարոզարշավի հիմնական հարցերից մեկն էր, որի ընթացքում նա կենտրոնացավ ներքին կիրարկման վրա։ Ինչպես գրում է BBC-ն, ընտրվելուց հետո Թրամփը կրկնել է անօրինական ներգաղթյալների զանգվածային արտաքսման իր նախընտրական խոստումը, ասել է, որ մտադիր է ազգային արտակարգ դրություն հայտարարել և օգտագործել ԱՄՆ զինված ուժերը՝ իր ծրագիրն իրականացնելու համար։ Թրամփի նախորդ վարչակազմի չորս տարիների ընթացքում մոտավորապես 1․5 միլիոն մարդ արտաքսվել է ինչպես սահմանից, այնպես էլ ԱՄՆ-ի տարածքից: Ինչպես հաղորդում է BBC-ն, վիճակագրությունը մոտավորապես նույնն է Բայդենի վարչակազմի օրոք։