Վոլոդինի խոսքով՝ USAID-ի կողմից ֆինանսավորվողների ցուցակները պետք է պահանջվեն և փոխանցվեն «ԷֆԷսԲե»-ին

«Նրանք, ովքեր փող են ստացել դրսից, այժմ պետք է հրապարակայնորեն ընդունեն դա և զղջան Կարմիր հրապարակում` և՛ կուսակցությունները, և՛ հասարակական կազմակերպությունները, և՛ իրավապաշտպանները»:

Հիմա նրանք հեռացել են՝ տեղափոխվածները՝ հույս ունենալով, որ USAID-ն իրենց կֆինանսավորի արտասահմանում։ Հիմա սոված նստած են՝ հույս ունենալով, որ իրենց էլի բան կտան։ Ոչ ոք ձեզ ոչինչ չի տա, դա հաստատ է։ Այնտեղ կային թշնամիներ, Կոնգրեսը քննարկում է [ով էր ֆինանսավորվում USAID-ից], և մենք պետք է Կոնգրեսից ցուցակներ պահանջենք։

Ո՞վ էր ֆինանսավորվում Ռուսաստանում։ Եթե նրանք ճանաչեն այս կազմակերպությունը որպես թշնամական, ապա ձեզ ցուցակներ կտան... Կոնգրեսը մեզ կուղարկի ցուցակները, իսկ մենք դրանք կտրամադրենք Անվտանգության դաշնային ծառայությանը»,- ասել է Վոլոդինը Դումայի լիագումար նիստի ժամանակ։

USAID-ը Ռուսաստանում փակվել է 2012 թվականին, և նրա գործունեությունը արգելվել է ՌԴ կառավարության որոշմամբ։ Այն ժամանակ ՌԴ ԱԳՆ-ը հայտարարել է, որ կազմակերպությունը դրամաշնորհների բաշխման միջոցով փորձում է ազդել քաղաքական գործընթացների, այդ թվում՝ ընտրությունների վրա։ Նույն թվականին Ռուսաստանում ընդունվեց օրենք «օտարերկրյա գործակալների մասին», որի նպատակն էր պայքարել հենց այն հասարակական կազմակերպությունների դեմ, որոնք ֆինանսավորում էին ստանում արտերկից և որոնց կառավարությունը չէր կարող վերահսկել։

Ինչպես գրում է BBC-ի ռուսական ծառայությունը, USAID-ը դոնոր է եղել Ռուսաստանում բազմաթիվ իրավապաշտպան կազմակերպությունների, այդ թվում՝ Մոսկվայի Հելսինկյան խմբին (լուծարվել է 2023 թվականին), ընտրությունների դիտորդական շարժմանը՝ Golos (հայտարարվել է «օտարերկրյա գործակալ» և «անցանկալի կազմակերպություն») և «Մեմորիալ» կազմակերպությանը (լուծարվել է 2022 թվականին)։

Հունվարի 20-ին՝ երկրորդ անգամ պաշտոնը ստանձնելուց մի քանի ժամ անց, ԱՄՆ նախագահ Դոնալդ Թրամփը գործադիր հրաման է արձակել, որով դադարեցրել է ԱՄՆ արտաքին օգնությունը 90 օրով։ Հրամանում ասվում է, որ Միացյալ Նահանգների արտաքին օգնության արդյունաբերությունը և բյուրոկրատիան ծառայում են «աշխարհի խաղաղության ապակայունացմանը՝ օտար երկրներում տարածելով գաղափարներ, որոնք ուղղակիորեն հակադրվում են երկրների ներսում և միջև ներդաշնակ և կայուն հարաբերություններին»:

Հունվարի 26-ին, Թրամփի գործադիր հրամանի համաձայն, պետքարտուղար Մարկո Ռուբիոն դադարեցրել է բոլոր արտաքին օգնությունը, որը ֆինանսավորվում էր Պետդեպարտամենտի և USAID-ի կողմից կամ միջոցով:

Փետրվարին USAID-ի գրասենյակը փակվել է, իսկ աշխատակիցներին ասվել է, որ հեռավար աշխատեն: Ըստ արտասահմանյան լրատվամիջոցների՝ ԱՄՆ կառավարությունը մտադիր է ամբողջ աշխարհում գործակալության 10 000 աշխատակիցներից միայն մի քանի հարյուրին թողնել։

«Վրացական երազանքի» կառավարությունը նույնպես քննադատում է USAID-ին։ Վերջին հայտարարություններում ոչ լեգիտիմ խորհրդարանի նախագահ Շալվա Պապուաշվիլին կազմակերպությանն անվանել է որպես «2020 թվականի խորհրդարանական ընտրությունները տապալելու փորձի» մասնակից, իսկ վարչապետ Իրակլի Կոբախիձեն գործակալությանը մեղադրել է երկրում հեղափոխություն անելու փորձի մեջ։