«Վրացական երազանքը» 224 ձայնով Վրաստանի նախագահ է ընտրել Միխեիլ Կավելաշվիլիին

Կենտրոնական ընտրական հանձնաժողովի վերջնական արձանագրության համաձայն՝ ընտրություններին մասնակցել է 300 հոգանոց ընտրական կոլեգիայի 225 անդամ։ Միխեիլ Կավելաշվիլիի օգտին քվեարկել է 224 անդամ, իսկ մեկ քվեաթերթիկ, որը պատկանում է Աբխազիայի Հանրապետության Գերագույն խորհրդի պատգամավոր Ադա Մարշանիային, համարվել է անվավեր։

«Վատ թեկնածու է։ Թեկնածու ընտրելիս պետք է ավելի լավ մտածել։ Դուք բոլորդ միասին վնասում եք Վրաստանին և ձեզ, ինչպես նաև քաղաքական իշխանությանը։ Ես չեմ քվեարկում, համապատասխան սյունակ չկա, ուստի ոչինչ չեմ նշում և պետք է դատարկ թուղթ գցեմ»,- այս խոսքերն է ասել Մարշանին՝ դատարկ քվեաթերթիկը քվեատուփի մեջ գցելուց առաջ։

Նախկին ֆուտբոլիստ, պատգամավոր, «Ժողովրդի ուժի» անդամ Միխեիլ Կավելաշվիլին, ով աչքի է ընկնում իր հակաարևմտյան հայտարարություններով, նախագահի միակ թեկնածուն էր։

«Վրացական երազանքի» պատվավոր նախագահ Բիձինա Իվանիշվիլին նոյեմբերի 27-ին Կավելաշվիլիին ներկայացնելիս ասել է, որ նրա ազնվությունը, արդարությունը, հայրենասիրությունը և սկզբունքներին հավատարմությունը «հատկապես առանձնացնում են նրան»։ «Իր բնույթով, եթե կուզեք՝ իր հաբիտուսով, նա վրացի տղամարդու լավագույն մարմնավորումն է»,- ասել է Իվանիշվիլին։ «Վրացական երազանքի» կողմից ընտրված նախագահը բարձրագույն կրթություն չունի։

Կավելաշվիլիի նախագահի պաշտոնում երդմնակալության արարողությունը նախատեսված է դեկտեմբերի 29-ին։ Պաշտոնապես այս օրվանից կդադարեցվի երկրի հինգերորդ նախագահ Սալոմե Զուրաբիշվիլիի լիազորությունները, ով ասում է, որ մնալու է որպես լեգիտիմ նախագահ, և իր «մանդատը շարունակվելու է այնքան ժամանակ, քանի դեռ չի եղել օրինական ընտրված խորհրդարան, որը լեգիտիմորեն կընտրի իրեն փոխարինողին»։