Վրացի տրոլները գերազանցեցին նույնիսկ ռուս տրոլներին. Եվրախորհրդարանի պատգամավոր

«Շնորհավորում եմ, «ամսվա տրոլ» մրցանակն այս անգամ նույնպես անպայման կտրվի վրացի «տրոլներին», նրանք գերազանցեցին նույնիսկ ռուս «տրոլներին»։ Ինչո՞ւ: Նրանք ինձ կնքել են որպես Հերման Գյորինգի հնարավոր ազգական։ Նմանատիպ միտք կառաջանա միայն նրանց մոտ, ովքեր օգտագործում են իմ օրիորդական ազգանվան ռուսերեն թարգմանությունը՝ «Գերինգ»։ «Գերինգ» [Gehring] և «Գյորինգ» [Göring] կիրիլիցայով գրվում են նույն ձևով, բայց լատիներեն գրառմամբ այս երկու ազգանունները ոչ մի ընդհանուր բան չունեն։ Ինչպես, բարեբախտաբար, ես նույնպես կապված չեմ որևէ նացիստ քաղաքական գործչի և ռազմական հանցագործ Հերման Գյորինգի հետ»,- ասել է Վիոլա ֆոն Կրամոնը։

Ըստ Եվրախորհրդարանի պատգամավորի, երկրորդ «ֆեյքը» էլ ավելի անհեթեթ էր՝ տեսանյութ է տարածվել, թե իբր նա հարբած վիճակում գտնվել է հարսանիքի:

«Ես հաճույքով կգնայի վրացական հարսանիքի, բայց դեռ ոչ մեկը ինձ չի հրավիրել։ Ես էլ այս տիկնոջ հետ կապ չունեմ։ Սա դասական այսպես կոչված դիփ ֆեյք տեսանյութ է։

Հետաքրքիր փաստ է, որ այս «ֆեյքը» կիսում էին հիմնականում իշխող խմբակցության կողմնակիցները։ Կարելի է պատկերացնել, որ այստեղ պետք է փնտրել նաև հավանական պատվիրատուին։ Կարծում եմ, որ շինծու տեսանյութեր տարածելու փոխարեն ավելի լավ է բաց քաղաքական քննարկումներ լինեն»:

Վիոլա ֆոն Կրամոնը հաճախ է դառնում «Վրացական երազանքի» ղեկավարների հարձակման առարկան։ Եվրախորհրդարանի պատգամավորը վերջին անգամ Վրաստանում է եղել ապրիլի սկզբին, երբ նա գնացել է կառավարության աշխատակազմի դիմաց՝ ի պաշտպանություն Լազարե Գրիգորիադիսի։ Մինչ այդ նա արձագանքել է Թբիլիսիում «օտարերկրյա գործակալների» մասին ռուսական օրենքի դեմ անցկացվող բողոքի ցույցերին ու ասել, որ ընթացիկ իրադարձություններն իրեն հիշեցրել են ուկրաինական մայդանը 2013-2014 թթ: «Վրացական երազանքի» նախագահ Իրակլի Կոբախիձեն նրան մեղադրել է Վրաստանում «արմատականներին» աջակցելու մեջ, իսկ խորհրդարանի առաջին փոխխոսնակ Գիա Վոլսկին ասել է, որ ֆոն Կրամոնն աջակցում է ակցիաների՝քաղաքացիական հակամարտության վերածմանը։