Վրաստանը չի միացել Եվրոպական միության «Մագնիտսկու ցուցակի» մասին որոշմանը

«Մագնիտսկու ցուցակի» վավերականության երկարաձգման կողմնակիցների թվում են ԵՄ անդամակցության թեկնածուի կարգավիճակ ունեցող երկրները, այդ թվում՝ Ուկրաինան և Մոլդովան։

«Հյուսիսային Մակեդոնիան, Մոնտենեգրոն, Ալբանիան, Ուկրաինան, Մոլդովայի Հանրապետությունը և Բոսնիա-Հերցեգովինան, ինչպես նաև Եվրոպական ազատ առևտրի ասոցիացիայի (EFTA) երկրները՝ Իսլանդիան, Լիխտենշտեյնը և Նորվեգիան, Եվրոպական տնտեսական տարածքի անդամ երկրները միանում են խորհրդի այս որոշմանը։ Նրանք պետք է ապահովեն, որ իրենց ազգային քաղաքականությունը համապատասխանի խորհրդի այս որոշմանը: ԵՄ-ն հաշվի է առնում այս հանձնառությունը և ողջունում այն»,- ասել է Եվրոպական միության արտաքին քաղաքականության և անվտանգության քաղաքականության գերագույն ներկայացուցիչ Ջոզեֆ Բորելը։

«Մագնիտսկու օրենքը» առաջին անգամ ընդունվել է 2012 թվականին Ամերիկայի Միացյալ Նահանգներում։ Օրենքը կրում է ռուս հարկային խորհրդատու Սերգեյ Մագնիտսկու անունը, ով մահացել է 2009 թվականին ռուսական բանտում։ Ի սկզբանե դրա թիրախն էին համարվում Մագնիտսկու մահվան համար պատասխանատու պաշտոնյաները: Նախքան բանտում հայտնվելը Սերգեյ Մագնիտսկին պնդում էր, որ բացահայտել է զանգվածային խարդախություն՝ կապված կոռումպացված պաշտոնյաների հետ, որոնք միլիարդավոր ռուբլիներ են գողացել Ռուսաստանի գանձարանից: 2016 թվականից Մագնիտսկու օրենքը պատժամիջոցներ է նախատեսում մարդու իրավունքների լուրջ խախտումների և կոռուպցիայի համար ամբողջ աշխարհում: Եվրամիությունը «Մագնիտսկու ակտի» անալոգը հաստատել է 2020 թվականին։

Եվրոպական խորհուրդը Վրաստանին մի քանի օր առաջ շնորհեց ԵՄ անդամակցության թեկնածու երկրի կարգավիճակ՝ հաշվի առնելով, որ երկիրը Եվրահանձնաժողովի հանձնարարականով նախատեսված քայլեր կձեռնարկի։ 9 պայմաններից երկրորդը Վրաստանի արտաքին քաղաքականության համապատասխանության բարելավումն է Եվրամիության ընդհանուր արտաքին քաղաքականության հետ։

Վրաստանի իշխանությունները դեռ չեն պարզաբանել, թե ինչու երկիրը չկա «Մագնիտսկու ցուցակի» վերաբերյալ Եվրոպական խորհրդի որոշման կողմնակիցների թվում։