Վրաստանը ներքաշելու են ՆԱՏՕ-ի մեջ, և ամեն ինչ կլինի Ուկրաինայի սցենարով. Լուկաշենկո

«Կանխատեսումները հուսադրող չեն։ Հավաքական Արևմուտքի ախորժակն ու ակտիվությունը միայն կմեծանա։ Վաշինգտոնը և նրա դաշնակիցները կշարունակեն ընդլայնել ՆԱՏՕ-ն։ Իրավիճակն առավել քան բարենպաստ է նրանց համար։ Ես ուղղակիորեն կասեմ՝ առանց ավելորդ դիվանագիտության. եվրոպացի գրեթե բոլոր առաջնորդները վերածվել են ԱՄՆ-ի հպատակների։ Կասկած չկա, թե ում քաղաքականությունը, ում շահերն են գերիշխում Եվրամիության տարածքում։

Ֆինլանդիայի և շուտով Շվեդիայի մուտքը ՆԱՏՕ՝ դեպի արևելք ընդլայնման հաջորդ փուլն է: Դաշինքի մեջ կներքաշվեն Բոսնիա-Հերցեգովինան, Մոլդովան, Վրաստանը, Սերբիան, և այս ամենը կլինի Ուկրաինայի սցենարով»,- ասել է Լուկաշենկոն։

Նրա խոսքով, բոլորը հիշում են, թե ինչպես ավարտվեցին «գործընկերային» քաղաքական խաղերը ուկրաինացի առաջնորդների հետ․ «փոփոխության գործակալների շերտի ձևավորմամբ՝ ռազմաքաղաքական կողմնորոշումը դեպի արևմտամետություն հետագա փոխելու համար և պատերազմով։ Հիմա խաղում են նաև Ուկրաինայի հետ։ Դաշինքին միանալու անորոշ հեռանկարը հաջողությամբ օգտագործվում է արևմտյան կուրատորների կողմից՝ Կիևի իշխանություններին մոտիվացնելու և խրախուսելու՝ շարունակել ռազմական գործողությունները»:

ՌԴ նախագահ Վլադիմիր Պուտինը ՆԱՏՕ-ի ընդլայնումն ուղղակի սպառնալիք է համարում իր երկրի անվտանգությանը և պնդում, որ դա է եղել 2022 թվականի փետրվարին Ուկրաինայում պատերազմ սկսելու պատճառը։ Սակայն Ուկրաինա ներխուժումը հակառակ արդյունքի բերեց՝ Շվեդիան և Ռուսաստանի անմիջական հարևան Ֆինլանդիան, որը երկար ժամանակ ռազմական չեզոքություն էր պահպանում, որոշեցին անդամակցել ՆԱՏՕ-ին։

Հյուսիսատլանտյան պայմանագրի կազմակերպությանը՝ ՆԱՏՕ-ին միանալը Վրաստանի հայտարարած ընտրությունն է։ 2017 թվականին Վրաստանի Սահմանադրության մեջ ավելացվել է 78-րդ հոդվածը, որը սահմանում է սահմանադրական մարմինների պարտավորությունը՝ իրենց լիազորությունների շրջանակում ձեռնարկել բոլոր միջոցները՝ ապահովելու Վրաստանի լիարժեք ինտեգրումը Եվրամիությանը և ՆԱՏՕ-ին։ «Ազգային-դեմոկրատական ​​ինստիտուտի» կողմից 2023 թվականի դեկտեմբերին հրապարակված հետազոտության արդյունքների համաձայն՝ բնակչության 79%-ը կողմ է Վրաստանի անդամակցությանը ԵՄ-ին, 67%-ը՝ ՆԱՏՕ-ին։