Վրաստանում տեղի է ունենում իրավիճակի ապակայունացում և ակցիաների ֆինանսավորում․ ՌԴ պաշտպանության նախարար

«Դաշինքի առանձին երկրներ փորձում են ամրապնդել իրենց դիրքերը Կովկասում՝ դրանով իսկ ելք ստանալով դեպի Կասպից ծովի ռեսուրսներ և ուղղակի ելք դեպի Կենտրոնական Ասիա։ Իրավիճակը ապակայունացվում է և ֆինանսավորվում են բողոքի ցույցեր Վրաստանում, որից պահանջում են ակտիվ հակառուսական գործողություններ»,- ասել է Բելոուսովը՝ ելույթ ունենալով Ղազախստանի Ալմաթի քաղաքում անցկացվող Հավաքական անվտանգության պայմանագրի կազմակերպության (ՀԱՊԿ) պաշտպանության նախարարների խորհրդի նիստում։

Բելոուսովն ընդգծել է, որ ՆԱՏՕ-ի և Եվրամիության կուրսը, որն, ըստ նրա, ուղղված է Ռուսաստանին դիմակայելուն, հանգեցնում է լարվածության աճին Հավաքական անվտանգության պայմանագրի կազմակերպության մի շարք շրջաններում։

«Միջնորդական ծառայությունները Հայաստանին և Ադրբեջանին առանց արարողակարգի են առաջարկվում՝ լուծելու իրենց տարաձայնությունները։ Առաջարկվում է խաղաղության պայմանագիր կնքել բացառապես արևմտյան հարթակներում և թելադրանքով։ Հատկապես մտահոգիչ են Վաշինգտոնի և Բրյուսելի ծրագրերը՝ անվտանգության և պաշտպանության ամրապնդման պատրվակով մեր հայ գործընկերներին իրենց շահերի ոլորտ ընդգրկելու համար»,- ասել է Անդրեյ Բելոուսովը։ Նշենք, որ Հայաստանի պաշտպանության նախարարն այսօրվա նիստին չի մասնակցել։

Վրաստանում բազմահազարանոց բողոքի ակցիաների պատճառ է դարձել իշխող կուակցության կողմից այսպես կոչված «օտարերկրյա գործակալների» մասին օրենքի կրկին նախաձեռնությունն ու դրա ընդունումը։ Չնայած լայնածավալ բողոքներին և արևմտյան գործընկերների կոչերին, «Վրացական երազանքը» հաղթահարեց ռուսական օրենքի վրա դրված նախագահի վետոն։ Ռուսաստանը միակ երկիրն է, որի ղեկավարները հրապարակայնորեն ողջունել և հավանություն են տվել նշված օրենքի ընդունմանը։