Խաթունա Սամնիձեն միացել է «Հանուն փոփոխությունների կոալիցիային»

«Ես որոշեցի լինել մարդկանց հետ, ում հետ կարող եմ երկխոսել, քննարկել, վիճել, պայմանավորվել և համատեղ կառավարել երկիրը, որպեսզի մարդիկ լինեն այս երկրի հիմնական կիզակետը։ Ես հաղթեցի իմ անձնական ճակատամարտը, հաղթեցի հիվանդությունը, անցա շատ տառապանքների միջով։ Հիմա երկիրը բուժելու ժամանակն է, և մենք դա կանենք կոալիցիա 4-ի հետ միասին»,- ասել է Սամնիձեն՝ Զուգդիդիում կայացած մամուլի ասուլիսում։

Բացի Խաթունա Սամնիձեից, կոալիցիային են միացել նաև էթնիկ ադրբեջանցի ակտիվիստները։ Վրաց լեզվի և գրականության բանասեր Օքթայ Քազումովի խոսքով՝ իր թիմում, որը կոչվում է «Ակտիվիստները հանուն ապագայի», ընդգրկված են Վրաստանի տարբեր շրջաններում բնակվող էթնիկ ադրբեջանցի ակտիվիստներ։ «Նրանք իրենց ամենօրյա եռանդով ու քրտնաջան աշխատանքով արդեն ապացուցել են, որ հավատարիմ ու բարի կամեցողներ են մեր հայրենիքին և կշարունակեն դա անել»,- ասել է Քազումովը։

Հոկտեմբերի 26-ին կայանալիք խորհրդարանական ընտրություններին մասնակցելու համար ընդդիմադիր քաղաքական կուսակցությունները կոալիցիաներ են կազմում.

• «Հանուն փոփոխությունների կոալիցիան» սկզբում ստեղծվել է «Ախալի», «Գիրչի՝ ավելի շատ ազատություն» և «Դրոա» կուսակցությունների կողմից։
• «Հզոր Վրաստանում» միավորվել են «Լելոն», Անա Դոլիձեի «Հանուն ժողովրդի» կուսակցությունը, «Ազատության հրապարակ» քաղաքական շարժումը և Ալեկո Էլիսաշվիլիի «Քաղաքացիներ» կուսակցությունը։
• «Միասնությունը» հիմնադրվել է «Միացյալ ազգային շարժում» և «Ստրատեգիա Աղմաշենեբելիի» կողմից։ Այս կոալիցիային միացել են քաղաքագետ Գիա Ջափարիձեն, պատմաբան Լաշա Բաքրաձեն և խորհրդարանի անկախ պատգամավորներ Արմազ Ախվլեդիանին և Թամար Կորձաիան։