Խազարաձեի, Ջափարիձեի և Ծերեթելիի գործով դատավճիռը վերաքննիչը թողել է անփոփոխ

Երկու կողմերն էլ Վերաքննիչ դատարանում բողոքարկել են Թբիլիսիի քաղաքային դատարանի 2022 թվականի հունվարի 12-ի դատավճիռը։ Դատախազությունը չի համաձայնել քաղաքային դատարանի՝ անօրինական եկամուտների օրինականացումը որպես խարդախություն որակելու վճռի հետ, մինչդեռ Մամուկա Խազարաձեն, Բադրի Ջափարիձեն և Ավթանդիլ Ծերեթելին կարծում էին, որ իրենց նկատմամբ կայացված մեղադրական դատավճիռը պետք է չեղյալ համարվի, և նրանք պետք է արդարացվեն։ Վերաքննիչ դատարանի կոլեգիան՝ բաղկացած Մերաբ Ջորբենաձեից, Դավիթ Մամիսեիշվիլիից և Վեփխիա Լոմիձեից, մերժել է բողոքները։

«Վերաքննիչ դատարանը, ինչպես քաղաքային դատարանը, ամբողջությամբ հաշվի է առել մեղադրող կողմի ներկայացրած ապացույցները։ Ըստ այդմ՝ կայացվել է մեղադրական դատավճիռ։ Ուղղակի վերաքննիչ դատարանը որակավորման մասով չի համաձայնել մեղադրող կողմին: Մենք կծանոթանանք փաստարկված դատավճռին և դրանից հետո կորոշենք բողոքարկման հարցը»,- ասել է դատախազ Արչիլ Տղեշելաշվիլին։

Մամուկա Խազարաձեն, Բադրի Ջափարիձեն և Ավթանդիլ Ծերեթելին պատրաստվում են դիմել Գերագույն դատարան։

«Սա իրավական աբսուրդ է, մարդու իրավունքների կոպիտ խախտում։ Մենք այստեղ ծերության մասին չենք խոսում։ Որևէ մեկը չմտածի, որ մենք բանտում չենք, որ գործը հին է։ Ոչ, ընկերներ: Դատախազությունն այս հարցում [խարդախության] մեղադրանք չի առաջադրել, և դա հորինել է դատավորը՝ առաջին անգամ դատավոր [Գիորգի] Արևաձեն, իսկ հիմա [Մերաբ] Զորբենաձեն դա հաստատեց։ Սա այն դատարանն է, որը ստեղծեց Բիձինա Իվանիշվիլին, վերցրեց նախորդ իշխանություններից, և ես վստահ եմ, որ այս դատավորները կրկին դատելու են «Վրացական երազանքի» առաջնորդներին, որոնք այսօր նրան քաղաքական աջակցություն են ցուցաբերում։

Մենք այսօր կապ կհաստատենք մեր փաստաբանների հետ և կբողոքարկենք որոշումը Գերագույն դատարանում: Դա երկար ճանապարհ է: Այն անձը, դատավորը, ով եղել է Բիձինա Իվանիշվիլիի փաստաբանը, Շալվա Թադումաձեն, ով գլխավոր դատախազն էր և մեր դեմ գործ հարուցեց, մեզ կդիմավորի Գերագույն դատարանում։ Հիմա գնում ենք դատավոր Թադումաձեի մոտ։ Սա աբսուրդի թատրոն է, աբսուրդի երկիր»,- ասել է Խազարաձեն։

Դատախազությունը Մամուկա Խազարաձեի և Բադրի Ջափարիձեի դեմ քրեական գործ է հարուցել 2018 թվականի օգոստոսի 2-ին՝ ապօրինի եկամուտների օրինականացման (փողերի լվացում) հոդվածով։ Դատախազությունը պնդում էր, որ 2008 թվականի ապրիլ-մայիսին «TBC Bank»-ը որպես վարկ 17 միլիոն ԱՄՆ դոլար է տրամադրել Ավթանդիլ Ծերեթելիի («Պիրվելի» հեռուստաընկերության սեփականատեր Վատո Ծերեթելիի հայրը) «Samgori M» և «Samgori Trade» ընկերություններին: Գործի նյութերի համաձայն՝ նույն օրը Խազարաձեն և Ջափարիձեն նույն ընկերություններից, որպես ֆիզիկական անձինք, նույնքան գումար են վարկ վերցրել «Samgori M»-ից և «Samgori Trade»-ից, որքան «TBC Bank»-ը շրջանառու միջոցների համալրման նպատակով տվել էր նրանց: Ըստ դատախազության՝ «TBC Bank»-ը դուրս է գրել ընկերություններին տրված վարկերը, և նշված վարկերը բանկին չեն վերադարձվել։

Մամուկա Խազարաձեն և Բադրի Ջափարիձեն իրենց նկատմամբ քրեական հետապնդումը գնահատել են որպես իշխանությունների գործողություն Անակլիա նավահանգստի նախագծի դեմ, քանի որ նրանց կողմից հիմնադրված «TBC Holding»-ը մասնակցել է նավահանգստի կառուցմանը և եղել «Անակլիայի զարգացման կոնսորցիումի» գլխավոր գործընկերը։

Հանրային պաշտպանը նույնպես ուսումնասիրել է Խազարաձեի, Ջափարիձեի, Ծերեթելիի գործը և ասել, որ գործում փողերի լվացման հետքեր չկան։