Խորհրդարանի մոտ ընթացող ցույցի ժամանակ ձերբակալվել են Դավիթ Քացարավան և Լազարե Գրիգորիադիսը

Դավիթ Քացարավան հատուկ նշանակության ջոկատի շրջափակից մի քանի մետր այն կողմ կանգնած հավանաբար հայտարարություն է արել, երբ մի քանի հատուկ ջոկատայիններ վազել ու ձերբակալել են նրան։ Այս ամենը նկարահանող քաղաքացու դեմքին պղպեղի սփրեյ են փչել։

Հեռուստահաղորդավար Նանուկա Ժորջոլիանին ասում է, որ ականատես է եղել Լազարե Գրիգորիադիսի ձերբակալությանը.

«Տեսան, որ ամենաանվնասը, ամենահանգիստը կանգնած է Լազարեն, բոլորը հանգիստ էին, բայց ինչ-որ մեկը գոռաց, դուրս եկան, Լազարեի ձեռքից բռնեցին ու քարշ տվեցին։ Նրանք հստակ գիտեին, թե ում բռնեն ու ներս բերեն»։

Մայրը նույնպես հաստատում է Լազարե Գրիգորիադիսի ձերբակալությունը։

Ներքին գործերի նախարարությունը դեռ տեղեկություն չի հրապարակում, թե քանի հոգի է բերման ենթարկված և ինչի հիման վրա։

Ռուսական օրենքի երրորդ ընթերցմամբ ընդունումից հետո խորհրդարանի դիմաց խաղաղ ցույցը ցրվեց։ Ներքին գործերի նախարարության տարբեր ստորաբաժանումների հետ մեկտեղ Ռուսթավելիի պողոտայում տեղակայվել են ջրցան մեքենաներ։

Ըստ ՆԳՆ հաղորդագրության՝ հանրահավաքը դուրս է եկել հավաքների և ցույցերի օրենքով սահմանված նորմերից և «բռնի բնույթ է ստացել»․

«Հասարակական կարգը վերականգնելու համար ՆԳՆ-ն կիրառել է օրենքով նախատեսված հատուկ միջոցներ»,- ասում են ՆԳՆ-ից՝ հանրահավաքի մասնակիցներին կոչ անելով «ենթարկվել ոստիկանության օրինական ցուցումներին և արհեստականորեն չսրել իրավիճակը, հակառակ դեպքում իրավապահները կկիրառեն օրենքով սահմանված հատուկ միջոցներ»։