Aİ ölkələrinin səfirləri Rusiyaya qarşı 14-cü sanksiyalar paketi ilə bağlı razılığa gəliblər. Bu məlumatı hazırda Avropa Şurasına sədrlik edən Belçika da təsdiqləyib.
Əsas xəbərlər
“Avropa İttifaqının səfirləri bu yaxınlarda Rusiyanın Ukraynaya təcavüzünə cavab olaraq güclü və əhəmiyyətli sanksiyalar paketi barədə razılığa gəliblər. Bu paket yeni məqsədyönlü tədbirləri təmin edir və boşluqları aradan qaldırmaqla mövcud sanksiyaların təsirini maksimuma çatdırır”, - Bu barədə Belçika Rəyasət Heyətinin "X"də dərc etdiyi bəyanatda deyilir.
“Reuters” nəşri yazıb ki, Avropa Birliyi ölkələri bir aydan çox müddətdir ki, növbəti sanksiyalar paketini müzakirə ediblər və nəhayət, Almaniyanın tələbi ilə bu, yumuşaldılmış formada təsdiqlənib. Xüsusilə, üçüncü ölkələrdə yerləşən Avropa firmalarının törəmə şirkətləri üçün Rusiyaya malların təkrar ixracını qadağan edən bəndin daxil edilməsindən imtina edilib. “Reuters”in məlumatına görə, belə bir tədbir Rusiyanın silah istehsalı üçün istifadə edə biləcəyi ikili təyinatlı texnoloji məhsulların (məsələn, paltaryuyan maşın çipləri) Rusiyaya tədarükünü dayandırmaq məqsədi daşıyırmış. Almaniya bu tədbirin nəticələrini öyrənməyi xahiş edib.
“Reuters”in məlumatına görə, 14-cü paket Rusiyanın mayeləşdirilmiş təbii qazının (LNG) Aİ suları vasitəsilə təkrar ixracını qadağan edir, lakin Aİ-nin 2022-ci ildə dəniz yolu ilə daşınan neft üçün etdiyi kimi idxalı qadağan etmir. Bununla belə, qaz bazarı mütəxəssisləri “Reuters”ə bildiriblər ki, bu tədbir az təsir göstərəcək, çünki Aİ limanları vasitəsilə Asiyaya qaz tədarükləri Rusiya qaz ixracının cəmi 10%-ni təşkil edir.
Bəzi Aİ ölkələri hələ də boru kəməri ilə Ukrayna vasitəsilə Rusiyadan qaz idxal edirlər. “Reuters”in mənbəsinə görə, paketə İsveç və Finlandiyaya idxal müqavilələrini ləğv etməyə imkan verən bənd də daxildir.
“Politico” nəşri qeyd edir ki, Avropa İttifaqı ilk dəfə olaraq Rusiya qazına qarşı sanksiyaları təsdiqləyib və bu, Moskvanı mayeləşdirilmiş təbii qazla bağlı biznes modelini, xüsusən də Asiyanı Avropa üzərindən təmin etmək hissəsində yenidən düşünməyə məcbur edəcək. “Rusiya artıq çox güman ki, bu yüklərin Arktika dənizi vasitəsilə marşrutunu dəyişməli olacaq, bunun üçün isə çatışmayan xüsusi təchiz olunmuş buzqıran gəmilərdən istifadə tələb olunacaq”, - nəşr yazır.
