Rusiyanın “Azimut” aviaşirkəti Tbilisiyə birbaşa müntəzəm uçuşları Başqırdıstandan da həyata keçirəcək. “Ufadan Gürcüstana çoxdan gözlənilən uçuşlar!” – Ufa Beynəlxalq Hava Limanı bu gün belə başlıqla bəyanat yayıb.
Əsas xəbərlər
Yanvarın 26-dan etibarən “Sukhoi Superjet 100” təyyarəsi həftədə bir dəfə Ufa-Tbilisi-Ufa marşrutu üzrə uçuşlar həyata keçirəcək. Hava limanından verilən məlumata görə, uçuşları onların strateji tərəfdaşı olan “Azimut” aviaşirkəti həyata keçirəcək.
“Uçuşun müddəti 3 saatdır. Biletlər artıq satışdadır”, - deyə hava limanının saytında dərc olunmuş bəyanatında bildirilir.
Gürcüstanın Mülki Aviasiya Agentliyinin icazəsi ilə “Azimut” artıq Moskva-Tbilisi, Mineralnıye Vodı-Tbilisi, Soçi-Tbilisi və Moskva-Batumi marşrutları üzrə uçuşlar həyata keçirir.
Sakstatın məlumatlarına görə, 2023-cü ilin ilk üç rübündə Gürcüstana 1 686 200 əcnəbi ziyarətçi gəlib. Onlardan 383 000-i Rusiya vətəndaşı olub.
2023-cü il mayın 10-da Rusiya prezidenti Vladimir Putin Gürcüstanla təxminən 4 il əvvəl dayandırılmış hava nəqliyyatının bərpası haqqında fərman verib. Bundan başqa, Gürcüstan vətəndaşları üçün 2000-ci ildən qüvvədə olan viza rejimi də ləğv edilib. Artıq mayın 19-da “Azimut”un ilk təyyarəsi Tbilisi Beynəlxalq Hava Limanına eniş edib və mayın 20-də isə “Georgian Airways” sərnişinləri Tbilisidən Moskvaya gətirib. İyul ayından etibarən Rusiyanın digər aviaşirkəti “Red Wings” Moskva-Kutaisi marşrutu üzrə uçuşlar həyata keçirməyə başlayıb.
Ukraynadakı müharibə ilə əlaqədar Avropa İttifaqı və bir sıra ölkələr Rusiyanın aviasiya sektoruna qarşı sanksiyalar tətbiq edib - Rusiyadan və Rusiyaya uçuşlar qadağan edilib. Avropa İttifaqı Gürcüstanı sanksiyalara qoşulmağa çağırıb.
Moskvanın birtərəfli qərarı ilə 2019-cu ildən Gürcüstanla Rusiya arasında hava əlaqəsi dayandırılmışdı. Buna səbəb isə rusiyalı deputat Sergey Qavrilovun Tbilisiyə səfərindən sonra başlayan kütləvi etirazlar olmuşdu.
